Валерый ЧУПАХІН, пенсіянер, былы загадчык Асіповіцкага РАА:

— Выбары кіраўніка краіны — магчымасць для простых людзей рашуча паўплываць на палітычны курс дзяржавы. Толькі такі ўплыў павінен ажыццяўляцца цывілізавана, дзеля чаго неабходна высокая культура народнага волевыяўлення. Яе фарміраванне — працэс працяглы і, на маю думку, яшчэ далёкі ад завяршэння. Аднак сёлетняя выбарчая кампанія паказвае, што вектар развіцця зададзены прадумана.

У нашай краіне створаны ўмовы, якія забяспечваюць канкурэнцыю ідэй паміж прэтэндэнтамі на пост кіраўніка дзяржавы, стымулююць актыўнасць выбаршчыкаў і адначасова надзейна ўтрымліваюць палітычныя працэсы ў прававым полі. Апошняе не ўсім падабаецца, але не трэба забывацца пра сусветны вопыт: “слабіна” сілавікоў у падобных сітуацыях даводзіла да бяды не адну дзяржаву.

Чаго асабіста чакаю ад сёлетніх выбараў? Зразумела, справаздачы Цэнтрвыбаркама. А калі сур’ёзна — узважанага і прагматычнага падыходу суайчыннікаў да запаўнення бюлетэняў з імёнамі кандыдатаў. Паставіць “птушачку” проста, але ад яе будзе многае залежаць у жыцці кожнага чалавека і ўсёй нашай краіны на працягу цэлай пяцігодкі. Легкадумнасць тут можа каштаваць вельмі дорага.