Учора на самай знакавай будпляцоўцы горада — станцыі абезжалезвання водазабора “Паўночны” — адбылася этапная падзея: пачаліся пуска-наладачныя работы.

Па словах старшага прараба прадпрыемства-генпадрадчыка ДУКДБП “Бялыніцкая ПМК-241” Дзяніса Сідарава, усё тэхналагічнае абсталяванне зманціравана, таму зараз будаўнікі займаюцца добраўпарадкаваннем тэрыторыі водазабора і аддзелкай памяшканняў станцыі. Работы ў ПМК яшчэ нямала, але недзе за тры-чатыры тыдні яны будуць завершаны.

А вось дакладны тэрмін пачатку эксплуатацыі станцыі сёння акрэсліць яшчэ немагчыма. Як паведамілі ў ПП “Фільтртэхнасэрвіс” (спецыялісты гэтага прадпрыемства займаюцца наладкай водаачышчальнай сістэмы), галоўны працэс, ад якога ўсё залежыць, — запуск 16 фільтравальных модуляў. Кожны ўяўляе сабой складаную ўстаноўку, дзе адбываецца хімічнае пераўтварэнне злучэнняў жалеза ў нерастваральныя формы. Хуткасць выхаду ўстановак у рабочы рэжым залежыць ад хімічнага складу вады, аднак на водазаборы “Паўночны” яна паступае з сямі свідравін і ўтварае “кактэйль” з малапрадказальнымі характарыстыкамі.

Па папярэдніх разліках, усе модулі запрацуюць належным чынам недзе праз месяц. Але не выключана, што часу спатрэбіцца болей. Так што будзем аптымістамі і спадзяёмся, што першую чыстую ваду водазабор “Паўночны” дасць асіпаўчанам напрыканцы лістапада.

З гэтай нагоды ўзгадаем пра сённяшнюю сітуацыю з якасцю вады, якую атрымліваюць гараджане. Па інфармацыі райЦГЭ, за мінулы тыдзень было зроблена 14 аналізаў у розных пунктах і толькі ў адным (на вуліцы Янкі Купалы) адзначана перавышэнне максімальна дапушчальнай канцэнтрацыі жалеза. Праўда, даволі значнае — больш чым у 10 разоў (3,29 мг/дм3, МДК — 0,3 мг/дм3).

Скарг на якасць вады было тры — ад жыхароў вуліц Урыцкага, Сташкевіча і Каданчыка.