Раўназначную паралель між выпускнікамі школ і працаўнікамі сельскай гаспадаркі і будаўнічай галіны праводзіць, безумоўна, некарэктна, але сёння ўсе яны ўскосна ператварыліся ў студэнтаў. Праўда, школьнікі свае іспыты ўжо здалі і цяпер, пасля цэнтралізаванага тэсціравання, у роздуме, якой навучальнай установе аддаць перавагу, а вось вяскоўцаў з будаўнікамі сваё “ЦТ” яшчэ чакае. Першыя напярэдадні галоўнага экзамену года — уборкі жніва, другія да пачатку новага навучальнага года павінны справіцца з рэканструкцыяй-узвядзеннем новых сучасных ферм у гаспадарках.
Днямі Дзмітрый Кулакоўскі, Канстанцін Доўгі і Валянцін Кузьміч — дырэктары УКП ЖКГ, ААТ “ПМК № 95 “Вадбуд” і УКДВП “Асіповічырамбуд” — на сваіх аб’ектах у калгасах “Авангард”, “Каўгарскі” і ААТ “Асіповічыаграпрамтэхзабеспячэнне” здавалі папярэдні “экзамен” старшыні райвыканкама Пятру Шукаловічу. Разам з вырашэннем процьмы самых розных штодзённых пытанняў, кіраўнік раёна пастаянна сочыць і за ходам рэканструкцый МТФ у гаспадарках, аператыўна дапамагае вырашаць тую-іншую праблему. Але на гэты раз наведванне Пятром Яфімавічам трох ферм крыху змяніла “фармат”. І не з мэтай “заваліць” кіраўнікоў на іспытах, а каб тыя на свае вочы ўбачылі справы калег, на месцах параіліся і вызначылі лепшыя варыянты выканання пэўных аперацый, падзяліліся назапашанымі сакрэтамі-напрацоўкамі і г.д.
Не варта, мусіць, падрабязна пералічваць ужо зробленае там і тое, дзе яшчэ трэба прыкласці нямала сіл — працэс, як гаворыцца, ідзе па ўсіх накірунках. А вось хоць асобныя меркаванні дырэктара АУКВП “Капітальнае будаўніцтва” Сяргея Падбярознага прывесці, думаецца, варта:
— Нават не спецыялісту бачна, што па ўзроўні гатоўнасці лідзіруе МТФ у Забалацці, дзе генпадрадчыкам выступае “Рамбуд”, за ёй — ферма ў Лучыцах. А вось у Краях меліяратарам хутчэй за ўсё трэба будзе дапамагаць, падключаць дадатковыя сілы, шукаць варыянты далучэння сюды субпадрадчыка.
З кожным задзейнічаным на МТФ калектывам дасканала вызначаны ўсе рабочыя моманты. Вытворчыя нарады праводзім рэгулярна, пры ўзнікненні любых тэхналагічных ці іншых пытанняў стараемся аператыўна іх вырашаць, пры неабходнасці ўносім карэктывы.

Сёння з фінансаваннем рэканструкцыі ферм праблем у раёне няма, грошы на набыццё патрэбных матэрыялаў у наяўнасці, але пажаданыя тэмпы стрымлівае недахоп рабочай сілы. І гэта нават з улікам таго, што на будаўнічых пляцоўках задзейнічаны будатрады. Прычым, гэта хвалюючая праблема не толькі для будаўнічых арганізацый — паглядзіце, колькі аб’яў з вакансіямі рабочых месцаў друкуецца ў нашай раённай газеце…
Ход работ на аб’ектах сведчыць, што яны вядуцца даволі напружана. Але і часу да выканання канкрэтна па-стаўленай задачы застаецца ўсё менш: першыя кароўнікі і даільна-малочныя блокі павінны быць здадзены да 1 верасня. Таму, як падкрэсліў старшыня райвыканкама, і работы трэба актывізаваць па-максімуму, выкарыстаць усе рэзервы.
Віталь КУЛАКОЎ.