19 верасня на палігоне “Асіповіцкі” адбылася афіцыйная цырымонія адкрыцця вучэнняў воінскіх кантынгентаў КСАР АДКБ “Узаемадзеянне-2013”.
Узгаданыя вучэнні ідуць на агульным аператыўна-стратэгічным фоне з сумеснымі вучэннямі Узброеных сіл Беларусі і Расіі “Захад-2013”, аднак прамой сувязі між імі няма: задачай калектыўных сіл аператыўнага рэагавання з’яўляецца ўжыванне агульных сіл і сродкаў дзяржаў, якія ўваходзяць у арганізацыю Дамовы аб калектыўнай бяспецы, для супрацьстаяння пагрозе міжнароднага тэрарызму і дзейнасці незаконных уз-броеных фарміраванняў.
Вучэнні КСАР АДКБ праводзяцца ўжо ў пяты раз і ўпершыню на тэрыторыі нашай краіны. Сімвалічна, што пачатак “Узаемадзеяння 2013” супаў з 70-годдзем пачатку вызвалення Беларусі ад нямецка-фашысцкіх захопнікаў: у перыяд з 22 па 30 верасня 1943 года войскамі Цэнтральнага фронту былі вызвалены першы райцэнтр Беларусі — Камарын, потым Хоцімск, Клімавічы, Касцюковічы, Мсціслаў і Крычаў.
У сённяшніх рэаліях арганізацыю Дамовы аб калектыўнай бяспецы можна лічыць найбольш дзейсным інструментам падтрымання геапалітычнага балансу на ўсёй постсавецкай прасторы.

Спецыфіка вучэнняў тычыцца двух прынцыповых момантаў: на іх запланавана адпрацаваць ключавыя элементы ўзаемадзеяння сіл тэрытарыяльнай абароны з воінскімі кантынгентамі КСАР і праверыць эфектыўнасць змен, унесеных у сістэму кіравання апошніх.
Старт вучэнням даў парад міжнароднага кантынгенту, які прымаў міністр абароны Рэспублікі Беларусь Юрый Жадобін. Пасля кароткага перапынку, падчас якога ваеннаслужачыя знялі з сябе паходную амуніцыю і здалі на захаванне зброю, яны прыступілі да баявой падрыхтоўкі.

Дарэчы, пражываць і ўдасканальваць тэарэтычныя веды ўдзельнікі вучэнняў будуць у спецыяльна пабудаваным палатачным лагеры, дзе для гэтага створаны ўсе ўмовы.
У знак павагі да беларускага народа і яго ваеннай гісторыі прадстаўнікі фарміраванняў КСАР у гэты ж дзень усклалі вянкі да манументу на Алеі герояў і да помніку воінам-інтэрнацыяналістам у Асіповічах.