Паправіць разетку ці замяніць лямпачку могуць многія. А вось выявіць месца пашкоджання кабельнай лініі пад сілу толькі спецыялісту. Менавіта такім і з’яўляецца Пётр Дзікун. Ужо восьмы год ён працуе электраманцёрам па рамонце і мантажы кабельных ліній Асіповіцкага раёна электрасетак філіяла “Бабруйскія электрычныя сеткі” РУП “Магілёўэнерга”. Разам з калегамі шукае месцы парушэння падземных ліній, калі такія з’яўляюцца.

У распараджэнні брыгады электраманцёраў — перасоўная лабараторыя, аснашчаная спецыяльнымі прыборамі, якія з дапамогай аўдыёсігналаў дазваляюць высветліць месца, дзе адбыўся абрыў ці парушэнне цэласнасці кабельнай лініі. У такіх выпадках праводзіцца замена ўчастка або рамонт кабелю з дапамогай злучальнай муфты. Нярэдка такое здараецца зімой, калі зямля прамерзла. Тады даводзіцца браць у рукі лом, перфаратар і рыдлёўку, каб дабрацца да патрэбнага кабелю.

Работы выконваюцца ў асноўным па райцэнтры, дзе пракладзены кабельныя лініі электраперадач. Але даводзіцца і на раён выязджаць, каб дапамагчы калегам, якія спецыялізуюцца па паветраных лініях. Асабліва ў непагадзь, калі адбываецца абясточванне некалькіх населеных пунктаў.

Дарэчы, Пётр мае чацвёрты разрад, гэта значыць — даволі кваліфікаваны ў сваёй справе спецыяліст. А дома ён ахвотна расказвае пра сваю работу сыну і дачушцы, якія вучацца ў 4 і 1 класах СШ № 2.