Мітынг, прысвечаны Дню памяці ахвяр Хатыні
Сонейка сёння свеціць сапраўды па-вясноваму, саграваючы прамёрзлую за зіму зямлю і радуючы людзей, якім ужо надта хочацца цяпла.
Можа, менавіта так яно свяціла і 79 гадоў таму. Але гэтага не бачылі жыхары Хатыні. Бо ў гэты сакавіцкі дзень неба над іх роднай вёскай было зацягнута дымам, а самі яны зажыва спалены ў адной з пабудоў.
З цягам часу 22 сакавіка стала днём памяці ахвяр фашызму. У гэты дзень па ўсёй краіне праходзяць жалобныя мітынгі. Адбыўся такі сёння і ў Бозаку — вёсцы, якую фашысты знішчылі разам з 496 жыхарамі, сярод якіх было нямала дзяцей.
На мерапрыемстве прысутнічала кіраўніцтва раёна, прадстаўнікі прадпрыемстваў і арганізацый, грамадскіх аб’яднанняў, моладзь.
Старшыня раённага Савета дэпутатаў Сяргей Сувееў, ветэран працы Алена Зайцава, першы сакратар РА ГА “БРСМ” Максім Кавальчук, іерэй Уладзімір Яроміч і ўсе іншыя прамоўцы адзначалі, што нямецка-фашысцкія акупанты праводзілі на акупіраваных тэрыторыях палітыку генацыду, палілі вёскі, забівалі і катавалі людзей. У кожнай сям’і былі свае страты, дзеці пазбаўляліся бацькоў, а матулі — сыноў. Трагедыя тых крывавых гадоў не павінна паўтарыцца.
А потым да помніка ляглі вянкі і кветкі. У жалобе ліліся па наваколлі словы песні “Жураўлі” ў выкананні мясцовага спевака. А на дрэвах весела шчабяталі шпакі, радуючыся цёпламу дню, вясне і жыццю.
