Сёлета Дзень Перамогі не зусім звычайны: спаўняецца 75-я гадавіна з векапомнага мая 1945 года. Зараз усе мы ўспамінаем сваіх родных, якія склалі галовы за шчаслівае жыццё краіны і народа, тых, хто вярнуўся з перамогай, і ўсіх жыхароў, якія перажылі акупацыю, аказваючы ўсялякае садзейнічанне вызваленню.

У гэтыя майскія дні ў краіне праходзіць рэспубліканская акцыя “Беларусь памятае. Памятаем кожнага”.

Па традыцыі напярэдадні свята кіраўніцтва раёна, прадстаўнікі працоўных калектываў, члены грамадскіх арганізацый наведалі брацкую магілу партызан Вялікай Айчыннай вайны на вуліцы Абросімава, помнік на брацкай магіле савецкіх воінаў, партызан і ахвяр фашызму каля вёскі Цяплухі і іншыя месцы воінскіх пахаванняў. Аддалі даніну памяці героям, якія абаранялі краіну ад ворага, усклалі вянкі і кветкі.

Брацкую магілу савецкіх салдат у Татарцы наведалі ваеннаслужачыя 5-й асобнай брыгады спецпрызначэння з Мар’інай Горкі. Дарэчы, раней абаронцы Айчыны добраўпарадкавалі мемарыял, пазнаёміліся бліжэй з гісторыяй баёў, якія праходзілі ў гэтых месцах у гады вайны. Да пастамента леглі кветкі павагі і памяці…