Вясна — пара аднаўлення. А яшчэ — час наводзіць чысціню. Чым і займаліся ў мінулыя выхадныя ўдзельнікі раённага маладзёжнага суботніка. Каля сотні юнакоў і дзяўчат адправіліся на барацьбу са смеццем: вучні Вяззеўскай школы, навучэнцы мясцовага каледжа, прадстаўнікі АЗАА, лясгаса, РАНС, налогавай інспекцыі, ААТ «ААБ Беларусбанк», аўтапарка № 19, Асіповіцкага ўпраўлення магістральных газаправодаў, ваеннаслужачыя в/ч 12180, чыгуначнікі і іншыя. Маладзёжны дэсант прывёў у належны выгляд вёску Вяззе, тэрыторыі ў раёне в. Смык, гарадскога пляжа і ад Вяззя да дачнага пасёлка Дружба. Каб даставіць маладых жыхароў горада да месца ўборкі, аўтапарк сумесна з лясгасам арганізавалі камфартабельны аўтобус.

— Смецця было вельмі шмат, — адзначае першы сакратар РА ГА «БРСМ» Ганна Дземідок, адна з арганізатараў і непасрэдная ўдзельніца суботніка. — Больш за ўсё назбіралі шкляных і пластыкавых бутэлек. А ўвогуле ж вывезлі два трактарныя прычэпы і машыну рознага хламу. Гэты факт, дарэчы, узрушыў маладых людзей: няўжо землякам так цяжка прыбіраць за сабой?

Канечне, у суботу вышэйназваныя тэрыторыі прывялі ў парадак. Але ці надоўга? Усё залежыць ад нас саміх. Давайце падтрымліваць чысціню — так жа і самім прыемней!

Фота Марыі ТАЛЕЙКА.