Даследчая дзейнасць Жорнаўскай эксперыментальнай лясной базы Iнстытута лесу НАН Беларусі вызначаецца тэматычным планам, які зацвярджаецца на самым высокім узроўні: біялагічным аддзяленнем Акадэміі навук і Дзяржкамітэтам па навуцы і тэхналогіях.

Адбор тэм і, адпаведна, іх фінансаванне — справа конкурсная, таму навукоўцам трэба выбіраць найбольш перспектыўныя пытанні, а яшчэ лепш праяўляць прадбачлівасць і прад’яўляць прапановы не на паперы, а ў выглядзе ўжо распачатых эксперыментаў.

Навуковы калектыў ЖЭЛБ, які ўзначальвае кандыдат сельскагаспадарчых навук Уладзімір Рашэтнікаў, мае ў запасе шэраг такіх ініцыятыўных доследаў. Адзін з іх — пад рабочай назвай “Спосаб рэканструкцыі нізкаплотных насаджэнняў дуба чарэшчатага метадам пасадкі культур яліны” — вядзецца ўжо на працягу 20 гадоў і толькі нядаўна прадстаўлены на разгляд экспертнай камісіі.

У спрошчаным выглядзе ідэя эксперыменту вось у чым. Звычайна ў лясах з колькасцю маладых дубоў ніжэй пэўнага ўзроўню, гэта парода выцясняецца бярозай і асінай. Калі ж замяніць канкурэнтаў маладых дубоў на яліну, то гэтыя каштоўныя віды дрэў утвораць устойлівы і вельмі прадукцыйны “дуэт”.

За ўзгаданы час ідэя асіповіцкіх навукоўцаў у асноўным ужо даказала сваю правільнасць, таму на распрацоўку канкрэтных практычных рэкамендацый па павышэнні якасці лясоў — а менавіта яны з’яўляюцца асноўнай “прадукцыяй” галіновай навукі, спатрэбіцца адносна нямнога часу — да пяці гадоў.

Дарэчы, у свой час атрымаўшая афіцыйную падтрымку тэма “Распрацоўка методыкі ўзнаўлення дуброў метадам рэканструкцыі лесанасаджэнняў” была распачата такім жа — ініцыятыўным — спосабам. Зараз гэтая інавацыя жорнаўскіх навукоўцаў праходзіць доследна-практычную праверку ў Копыльскім лясгасе.

Па словах Уладзіміра Рашэтнікава, у дзейснасці сваіх рэкамендацый распрацоўшчыкі ўпэўнены, аднак іх удасканаленне працягваецца. Прычына таму — істотнае змяненне клімату. Беларускія лясы, зразумела, здольны прыстасоўвацца да вельмі шырокіх варыяцый вільготнасці і тэмпературы, аднак абгрунтаваная дапамога дазваляе абысціся пры гэтым без страт прадукцыйнасці.

Дзмітрый САЎРЫЦКI.