Апошнія летнія тыдні адпачываюць хлопчыкі і дзяўчынкі: неўзабаве школы расчыняць свае дзверы для вучняў. Але пакуль мам і тат хвалюе не паспяховасць дзяцей, а доўгі спіс патрэбных пакупак да першага верасня. Гэта не толькі канцылярскія прылады, але і ранец, адзенне і абутак. У некаторых бацькоў у гэтай справе ўжо ёсць пэўны досвед і яны збіраюць сына ці дачку па знаёмым сцэнарыі, а вось да першакласнікаў падыход асобы: трэба не толькі дазнацца пра неабходныя рэчы для школы, але і знайсці месца, дзе іх набыць. Школьны базар дзейнічае ўвесь жнівень у выхадныя дні на гарадскім рынку, але і ў крамах і павільёнах райцэнтра ёсць выбар. У адным з іх сустрэлі вельмі рухомага хлопчыка Ціхана Лепясевіча з сястрой Аляксандрай і мамай. Ён першы раз збіраецца ў школу, але для будучага вучня пакуль больш цікавыя цацкі, якія прапануюць у суседнім аддзеле крамы. Выконваць план па падрыхтоўцы да школьных будняў толькі пачалі і зараз знаходзяцца ў пошуках неабходнага.