Фотафакт

Рэспубліканскі аўтапрабег “За адзіную Беларусь” адбыўся 3 кастрычніка

Ён стартаваў на мяжы з Расіяй і меў канечным пунктам Брэсцкую крэпасць

“Пераадолеўшы звыш 500 кіламетраў, калона ў складзе больш за 400 адзінак аўтатранспарту ўрачыста фінішавала ў цытадэлі над Бугам, дзе ўдзельнікі акцыі разгарнулі вялізны дзяржаўны сцяг як сімвал міра і адзінства”, — паведамляе газета “СБ — Беларусь сегодня”.

Асіповіччыну ў гэтай маштабнай акцыі прадстаўляў экіпаж у складзе Мікалая Каралёва, Сяргея Каралёва, Кірыла Ланавенкі і Сяргея Ланавенкі. Як бачна па прозвішчах, гэта бацькі з сынамі.

Апошні дапоўніў узгаданую вышэй інфармацыю цікавымі тэхнічнымі дэталямі і асабістымі ўражаннямі:

— Мы далучыліся да іншых удзельнікаў у Мінску, арганізавана праехалі праз сталіцу і накіраваліся ў Брэст. Па “алімпійскай” трасе рушылі ў вольным рэжыме — кожны вадзіцель выбіраў зручную хуткасць, пры неабходнасці мог спыніцца для дазапраўкі ці ў зонах адпачынку. Аднак аўтамабілі далёка не расцягваліся: адказнасць дысцыплінуе. Наш экіпаж трымаў над машынай сцяг Асіповічаў — у знак павагі да малой радзімы.

У кожным горадзе, паблізу якога пралягаў маршрут прабегу, далучаліся новыя ўдзельнікі, так што пры пастраенні на пункце збору — лётным полі Брэсцкага аэрапорта — двухшэраговая калона машын расцягнулася больш за 2 кіламетры.

Але ўразіў не столькі колькасны маштаб, колькі ўзнёслая атмасфера. Зарад пазітыву атрыманы неймаверны! Гэта пачуццё менавіта тое, што трэба, каб сёння ўпэўнена рушыць уперад — як асобнаму земляку, так і нашай краіне ў цэлым.