Гісторыя нашай краіны, лёсы не аднаго з землякоў звязаны з падзеямі далёкага кастрычніка 1917 года. Зараз мы будуем сацыяльна арыентаваную дзяржаву, абапіраючыся на гістарычны вопыт народа, на ўсё лепшае, што было створана пакаленнямі савецкіх людзей.

Аб гэтым і многім іншым гаварыў у сваім віншаванні з чарговай гадавінай Вялікай Кастрычніцкай рэвалюцыі старшыня райсавета дэпутатаў і кіраўнік раённай арганізацыі КПБ Аляксандр Пузік. На плошчы каля помніка правадыру міравога пралетарыяту Уладзіміру Iльічу Леніну 7 лістапада з чырвонымі гваздзікамі і вянкамі сабраліся прадстаўнікі Камуністычнай партыі Беларусі, ветэранскіх арганізацый раёна, грамадскіх аб’яднанняў “Белая Русь” і “Беларускі рэспубліканскі саюз моладзі” і проста жыхары раёна, каб ушанаваць памяць аб тых лёсавызначальных днях. I, нягледзячы на розную ацэнку сучаснымі гісторыкамі, рэвалюцыя застаецца назаўсёды адной з самых важных падзей ХХ стагоддзя.

Тое, што гэтая дата ўшаноўваецца ў краіне, гаворыць аб беражлівых адносінах народа да свайго мінулага. Асноўны ж лозунг цяперашняга часу — стваральная праца на карысць Беларусі.