Апытанне

Чырвоны дзень календара

7 лістапада 1917 года ў Петраградзе адбылося ўзброенае паўстанне, якое закончылася ўзяццем Зімняга палаца, арыштам членаў Часовага ўрада і абвяшчэннем улады Саветаў, якая праіснавала больш за 70 гадоў.

7 лістапада адзначалася ў СССР як галоўнае свята — Дзень Вялікай Кастрычніцкай сацыялістычнай рэвалюцыі. На календары і сёння гэта дата пазначаецца чырвоным колерам. А што за ёй? Аб гэтым і пагутарылі з землякамі.

Ларыса Рымашэўская:

— Найбольш значным гэты дзень быў, калі вучылася ў школе. З чырвонымі сцягамі і кветкамі мы, піянеры і камсамольцы, ішлі на дэманстрацыю. Ведаеце, у мяне дома і зараз захоўваецца партрэт Уладзіміра Ільіча Леніна — правадыра рабочага класа і сялян. І наогул паважаю гісторыю свайго горада і краіны. Мой дзядзька быў гераічным партызанам, абараняў родны край. Усё гэта памятаю і даражу сваёй спадчынай.

Вадзім Ганчаронак:

— Зараз працую на заводзе транспартнага машынабудавання. У мітынгах у дзень Кастрычніцкай рэвалюцыі не ўдзельнічаю. А вось у час вучобы ў СШ № 1 не раз хадзіў у святочнай калоне. Безумоўна, гляджу ў гэты дзень навіны па тэлевізары, настальгірую. Зараз дзеці па-іншаму адносяцца да тых падзей.

Дарэчы, 7 лістапада ў нашай сям’і яшчэ адна ўрачыстасць — дзень нараджэння.

Раман Цішкевіч:

— Вучуся ў выпускным класе гімназіі. Пра падзеі, якія адбываліся больш за стагоддзе таму, ведаю пераважна з кніг па гісторыі. Мае родныя не былі сведкамі таго часу, а таму нічога не расказвалі ні пра Леніна, ні пра захоп улады бальшавікамі. У сацсетках таксама такія пытанні не абмяркоўваем.

Алена Дольская і Алег Астаповіч:

— Мы сваіх поглядаў і звычак не мяняем. Як раней, так і цяпер у дзень Вялікага Кастрычніка накрываем святочны стол, за якім збіраемся ўсёй сям’ёй. Гатуем любімыя стравы. І абавязкова сяброў і родных віншуем з гэтай нагоды. Канечне ж, ужо не адпраўляем паштоўкі, як калісьці было заведзена, а шлём прывітанні і пажаданні з дапамогай сучасных сродкаў сувязі.

У кожнай гістарычнай эпосе ёсць свае плюсы і мінусы. І чаго нам зараз не хапае з таго, што было ў дзяцінстве і маладосці, гэта стабільнасці.

Заўтра ў чарговы раз мы перагорнем старонку календара і прачытаем: “7 лістапада”. Давайце ж чарговы раз паглядзім тэлефільм пра тагачаснае жыццё, узгадаем пра падзеі гісторыі, звязаныя з гэтай датай, у якіх, дарэчы, так ці інакш удзельнічалі і нашы прапрабабулі і прадзядулі…