За няпоўныя тры дні датэрміновага галасавання на Сацыялістычны участак №3, які размясціўся ў сярэдняй школе №2, завіталі больш за сотню асіпаўчан. Усяго ж тут маюць магчымасць пакінуць свой голас за аднаго з кандыдатаў 1788 мясцовых жыхароў, якія зарэгістраваны на тэрыторыі ўчастка.

Як і паўсюль, выбаршчыкаў на Сацыялістычным чакаюць з 10 гадзін раніцы і да 19 вечара з перапынкам з 14.00 да 16.00. Зразумела, на відавоку – уся неабходная інфармацыя: звесткі пра кандыдатаў, склад камісіі, пратакол за папярэдні дзень і іншае. У камісіі расказалі, што асноўная частка тых, хто ўжо зрабіў свой выбар – пенсіянеры і ваеннаслужачыя: афіцэрскі інтэрнат знаходзіцца непадалёк. У першыя паўгадзіны пасля адкрыцця ўчастка бываюць нават «чэргі» з 3-5 чалавек. Але чакаць доўга не прыходзіцца: усе пытанні вырашацца за некалькі хвілін. Як адзначылі на ўчастку, прычынамі, з-за якіх грамадзянін вырашыў прагаласаваць датэрмінова, не цікавяцца – гэта асабістая справа кожнага. Некаторыя самі адзначаюць: “Маем планы на выхадныя, але і грамадзянскі абавязак выканаць таксама жадаем”.