Далучэнне да традыцый
Ладзіць фальклорныя святы для выхаванцаў дзіцячага садка № 11 “Зорачка” стала ўжо добрай традыцыяй. І адкрываюць каляндарны год Каляды, якія з даўняй пары сімвалізуюць перамогу добрых сіл над злымі. Падчас гулянняў і абрадаў актыўна гучаць пажаданні дабрыні, здароўя і багацця на ўвесь год.
Малым вельмі падабаецца гэта вясёлае свята, яны ахвотна спяваюць песні-калядкі, развучваюць ролі, частуюцца смачнымі цукеркамі і печывам. Вось і сёлета калядоўшчыкі завіталі да малых. Выхаванцы старшых груп памятаюць персанажаў свята з мінулага года і з нецярпеннем чакалі сустрэчы, а вось наведвальнікі ясляў упершыню пазнаёміліся з казачнымі Казой, Мядзведзем і Варажбіткай.
Хлопчыкі і дзяўчынкі былі не толькі гледачамі падрыхтаванага тэатралізаванага прадстаўлення, але і самі прымалі ўдзел у традыцыйных калядных гульнях: вадзілі карагоды, танцавалі “Лявоніху”, дзякавалі гасцям пачастункамі, слухалі вясёлыя песенькі-калядкі, якія ўслаўляюць гаспадароў за шчодрасць, дабрыню, гасціннасць, нясуць пажаданне здароўя, шчасця і добрага настрою на ўвесь новы год.
Рабяты атрымалі не толькі незабыўныя эмоцыі, але і змаглі дакрануцца да вытокаў культуры нашага народа, яго традыцый, якія назаўжды пакінуць след у памяці кожнага дзіцяці.
