“ДАЖЫНКI” сёлета пройдуць, як вядома, у Жлобіне, і тут поўным ходам ужо ідзе падрыхтоўка да рэспубліканскага фестывалю-кірмашу працаўнікоў вёскі. Сярод значных падзей плануецца і сканчэнне работ па аб’екту “Электрыфікацыя ўчастка Асіповічы-Жлобін-Гомель. 1-я чарга” з адкрыццём руху на электрацязе ад нашага райцэнтра да сталіцы “Дажынак-2013”.

ЗАБАРОНЕНА ЛАВIЦЬ з 1 красавіка па 30 мая ўсе віды рыбы. Выключэнне — аматарскае рыбалоўства адной вудай ці спінінгам. Таксама на рыбалоўных угоддзях не дазваляецца “паляванне” на сома звычайнага — з 31 мая па 1 ліпеня, рака вузкапалага — з 15 кастрычніка па 15 ліпеня і г.д.

У РАУС за дапамогай, са скаргамі, карыснай для супрацоўнікаў міліцыі інфармацыяй звярнулася каля 2 тысяч жыхароў. 7 паведамленняў аказаліся беспадстаўнымі, і цяпер несумленным людзям за такія “жарты” пагражае штраф ад 2 да 50 базавых велічынь.
АКЦЫЯ “АРСЕНАЛ” — з 1 па 5 красавіка. Як вядома, за незаконнае захаванне вогнестрэльнай наразной і гладкаствольнай зброі і боепрыпасаў да яе, а таксама выбуховых рэчываў устаноўлена адміністрацыйная і крымінальная адказнасць. Асобы, якія добраахвотна здадуць такія прылады, вызваляюцца ад пакарання.
НА ВЯСЕННIХ КАНIКУЛАХ школьныя лагеры наведваюць 362 чалавекі. У горадзе самы вялікі ён у СШ № 1 — 50 вучняў, а на раёне — у Лапіцкай школе (24).

У АЎТАПАРКУ-19 з пачатку года прададзена каля 30 тысяч праязных білетаў і 1,7 мільёна талонаў на праезд у грамадскім транспарце.