Асiповiччына: коратка аб розным
108У МАГАЗIНЕ № 7 «ВЕТРАЗЬ” ААТ «ГАНДАЛЬ” пачаўся капрамонт. На яго мадэрнізацыю плануецца выдаткаваць каля 1мільярда рублёў. Галоўны падрадчык — прыватнае будпрадпрыемства «Федзечкін”. Таксама хутка распачнецца ўзвядзенне модульнага магазіна (вул. Сумчанкі) побач з КБА № 2.
УСТАНОВА «АСIПОВIЦКАЯ РАС РДГА ”БЕЛАРУСКАЕ ТАВАРЫСТВА ПАЛЯЎНIЧЫХ I РЫБАЛОВАЎ” да 5 чэрвеня будзе весці прыём прапаноў па праекце Указа Прэзідэнта краіны аб правілах палявання і рыбалоўства. Такім чынам, у 800 землякоў, якія ўваходзяць ва ўзгаданую суполку, ёсць выдатная магчымасць унесці свой уклад ва ўдасканаленне прыродаахоўнага заканадаўства.
РАЁННЫ ЦЭНТР НАРОДНЫХ РАМЁСТВАЎ I ДЭКАРАТЫЎНА-ПРЫКЛАДНОГА МАСТАЦТВА штогод прымае ўдзел у Міжнародным фестывалі дзіцячай творчасці «Залатая пчолка” ў Клімавічах, які ў гэтым годзе пройдзе з 29 мая па 2 чэрвеня. Ксенія Асадчая — выхаванка педагога і майстра па ткацтве Аляксандры Рыбак — стала пераможцай I адборачнага тура і прыме ўдзел у яго заключным этапе.
Як паведамілі ў АДДЗЕЛЕ ФIЗКУЛЬТУРЫ, СПОРТУ I ТУРЫЗМУ РАЙВЫКАНКАМА, у нядзелю тры асіповіцкія аграсядзібы — «Гасцінны падворак”, «Свіслач” і «Лілія”, якія размешчаны ў Лапічах і Свіслачы (гаспадары Таццяна Ліхалап, Марыя Пішчык і Любоў Каласкова) — будуць прымаць у сябе выхаванцаў дзіцячых дамоў сямейнага тыпу вобласці. Дзецям прапануюць насычаную праграму, яны змогуць не толькі адпачыць, але і набыць новых сяброў.
ДОМ АБРАДАЎ. Згодна з новаўвядзеннямі, прадугледжанымі Законам аб шлюбе і сям’і, якія ўступілі ў дзеянне з 1 студзеня, у органаў ЗАГС з’явіліся паўнамоцтвы па скасаванні шлюбу, калі маецца ўзаемная згода, няма непаўналетніх дзяцей і спрэчак аб маёмасці. Па словах спецыялістаў, такой магчымасцю скарысталася ўжо 15 пар.
ЭКАНАМIСТЫ АЎТАПАРКА № 19 падлічылі, што з пачаткам цёплага надвор’я колькасць пасажыраў у грамадскім транспарце значна знізілася. Так, у параўнанні з красавіком, выручка ад рэалізаваных талонаў і білетаў паменшылася прыблізна на 26 мільёнаў. А вось адносна адпаведнага перыяду мінулага года прададзена праязных дакументаў на 30 мільёнаў больш.
I яшчэ. З учарашняга дня цана талона ў гарадскім аўтобусе — 1.700 рублёў, а набыты ў вадзіцеля каштуе на 200 даражэй.
