Над рыбакамі жартуюць, што нібыта самая вялікая са злоўленых імі рыбін сарвалася з кручка. А вось з агароднікамі такія жарты не пройдуць, бо вынікі іх шчырай працы ляжаць на градках і нікуды не ўцякаюць.

Памідор вагай у 1,5 кг вырасціў Валерый  Доўнар.

* * *

Штогод Лідзію Жырнікаву радуюць яе дрэвападобныя лілеі. Аднак сёлета вышыня кветак перасягнула ўсе чаканні.

— Вельмі хацелася ўбачыць максімум, на які здольная гэта расліна. Да таго ж надвор’е было засушлівае, таму надавала гэтай кветцы больш увагі. Як вынік, лілеі выраслі больш за два метры, а прыемны водар ад іх суквеццяў адчуваўся нават на языку і запаўняў сабою ўсё навокал.

* * *

Добры ўраджай цыбулі атрымала Ірына Цішурова. Сёлета яна паспрабавала вырасціць гэту культуру з насення. Шчыра кажучы, клопатаў з ёй было нямала, але вынік прыемна ўразіў: вялікія, залацістыя, амаль адна ў адну цыбуліны вагою ў паўкіло.

* * *

Цуда-кабачок даўжынёй 100 сантыметраў і вагой 3,5 кілаграмы вырасціла Вікторыя Дварэцкая. І гэта не гародніна-пераростак, якая доўга чакала свайго часу на градцы. Кабачок гатунку “кобра” насамрэч павінен быць вялікім. Цікава тое, што пры такіх памерах гародніна мае мяккую лупіну і мякіш амаль без зярнятак.

Дасылайце фота сваіх агародных цудаў у Viber ці Telegram на нумар +375 44   588-25-79 з паметкай “Рэкорд”. Самыя ўражваючыя будуць апублікаваны.