Наш чытач Уладзімір Рачкоўскі
з вёскі Рафалін у сваім лісце задаў шэраг пытанняў. Друкуем адказы адказных
асоб на іх.

— Калі ў Ліпені з’явіцца
кваліфікаваны доктар?

Яўген Цхаўрэбаў, галоўны ўрач
установы аховы здароўя “Асіповіцкая цэнтральная раённая бальніца”:

— З 2 жніўня ў Ліпеньскай
бальніцы прыступіла да выканання сваіх абавязкаў урач Анастасія Біткоўская.

— Чаму з калонак вёскі
Рафалін цячэ брудная вада?

Сяргей Зубарык, в.а.
дырэктара АДУКПП “Водаканал”:

— Артэзіянская свідравіна ў
в. Рафалін была ўведзена ў эксплуатацыю ў 1990 г. Па дадзеных
першапачатковых лабараторных аналізаў проб вады, утрыманне жалеза ў іх склала
2,21 міліграма на кубічны дэцыметр пры санітарнай норме 0,3 мг/дм3. Такім
чынам, вада насель-ніцтву вёскі падаецца з павышаным утрыманнем жалеза.
Санітарныя апрацоўкі і прамыўкі водаправодных сетак і артэзіянскай свідравіны
належнага эфекту не даюць, таму што не могуць паўплываць на колькаснае
ўтрыманне жалеза ў ваданосным гарызонце, з якога ажыццяўляецца падача вады.

— Ці будзе ў Ліпені працаваць
лазня?

Аляксандр Маслаў, дырэктар
АДУКВП “Райсервіс”:

— Лазня была перададзена на
баланс прадпрыемства ў нерабочым стане. Калі будзе ажыццяўляцца яе рамонт,
цалкам залежыць ад фінансавання. На сённяшні дзень яно адсутнічае.

— Чаму вырубілі калгасны сад
— зямля ж тая так і не выкарыстоўваецца?

— У час апрацоўкі кукурузнага
поля было ветранае надвор’е, і хімікаты трапілі на агароды сялян. Зараз на
агародзе нічога не расце. Чаму гэта было дапушчана?

Алег Грышчанка, дырэктар
філіяла “Белшына-агра” ААТ “Белшына”:

— У вёсцы Вязаўніца адбылося
выкарчоўванне саду плошчай 30 гектараў. Дрэвы былі старыя, не мелі неабходнай
ураджайнасці. Зараз распілавана і пахавана 20 га дрэў і выконваецца
распілоўка 5 га
сада. На плошчы выкарчаванага сада ўносяцца арганічныя ўгнаенні для далейшай
рэкультывацыі пасеваў культурных раслін.

У вёсцы Рафалін апрацоўка
кукурузы адбывалася глебавым прэпаратам “Адэнга” з захаваннем
існуючых рэгламентаў. На участку грамадзяніна У.П.Рачкоўскага пасля агляду
слядоў угнятання раслін хімічнымі прэпаратамі не выяўлена. Слабае развіццё
раслін на ўзгаданым участку абумоўлена нізкім узроўнем агратэхнікі.