Пачатак года быў адзначаны цэлым шэрагам браканьерскіх забойстваў зуброў. Пяць жывёл, якія ў Беларусі знаходзяцца, бадай, пад самай пільнай аховай, невядомыя асобы, сярод якіх, верагодна, былі і замежныя паляўнічыя, амаль адначасова знішчылі ў Хойнікскім і Валожынскім раёне.

Рэзанансная падзея стала нагодай для ўзбуджэння крымінальнай справы і ажыццяўлення маштабных мер па інвентарызацыі зубрынага статка, праверцы дзейснасці мер нагляду за асобнымі папуляцыямі. Днямі ўзгаданая інвентарызацыя прайшла і ў нашым раёне, і сёння “Вытокі” прапануюць чытачам азанаёміцца з некаторымі лічбамі і фактамі, якія тычацца асіповіцкіх зуброў.

Па стане на пачатак 2012 года прыблізная колькасць мікрапапуляцыі склала 190 асобін, з якіх дарослых самцоў — 20%, самак — 40%, напаўдарослых самцоў — 10%, самак — 20%, цялят — 10%. У параўнанні з мінулым годам памер статка павялічыўся недзе на чвэрць.

Летась на ўтрыманне мікрапапуляцыі са сродкаў лясгаса і мясцовых бюджэтаў было выдаткавана 49,6 млн. руб., з якіх на набыццё кармоў — 28 млн. руб. За гэтыя грошы закуплена 9,5 тоны зерня, 32 — сіласу, 20 — кармавых буракоў, 10 — кукурузы, 40 — саломы аўсянай.

Сёлета ДДЛГУ Асіповіцкі доследны лясгас ужо выдзеліў на закуп сіласу звыш  12 млн. руб. Таксама ў адпаведнасці з “Планам мерапрыемстваў па захаванні і рацыянальным выкарыстанні зуброў на 2010-2014 гады” лясгас праводзіць мерапрыемствы па ветэрынарным наглядзе і прафілактыцы паразітарных захворванняў у іх статку, засявае 16 гектараў падкормачных палеткаў.

Ахова мікрапапуляцыі ажыццяўляецца камандай з 5 егераў, якія маюць 3 матацыклы, аўтамабіль УАЗ, 6 адзінак агнястрэльнай зброі. Падкормка жывёл вядзецца на 3 пляцоўках, куды кармы дастаўляюцца па меры неабходнасці.

Сістэма аховы і нагляду за станам здароўя жывёл дастаткова дзейсная: за мінулы год спроб браканьерскай здабычы і падзяжу асобін гэтага віду не адзначана.

На момант правядзення інспекцыйных мерапрыемстваў зубры канцэнтраваліся на тэрыторыі Градзянскага лясніцтва лясгаса і сельгасугоддзях СВК “Калгас “Чырвоны ўдарнік”.

Зараз разглядаецца пытанне аб выбракоўцы са статка як мінімум 5 старых — 14-16-гадовых — жывёл, якія з-за ўзросту ўжо не маюць рэпрадукцыйнай каштоўнасці.

Зміцер КАЛЯДА.