Дбаем пра тое, што маем

У перыяд з 16 па 23 красавіка Міністэрства
лясной гаспадаркі краіны праводзіць
рэспубліканскую акцыю “Тыдзень лесу-2011”.

Прыняць удзел у ачыстцы зямель ляснога фонду ад
смецця і павалу, пасадцы дрэў можа кожны жадаючы, прычым, не за “дзякуй”, а
атрымоўваючы за дапамогу лясной гаспадарцы пэўны заробак. Усе неабходныя
звесткі для ўдзелу ў “Тыдні лесу” можна атрымаць у лясніцтвах ДДЛГУ “Асіповіцкі
доследны лясгас”.

Таксама жыхары горада запрашаюцца 16 красавіка
да ўдзелу ў валанцёрскай акцыі па ачыстцы ад бытавых адыходаў берагоў
Асіповіцкага вадасховішча. Адпраўленне ўдзельнікаў з плошчы імя Леніна ў 8.30.

* * *

Вырошчванне лясоў — справа марудная, клапотная
і, па вялікаму рахунку, фінансава не асабліва прыбытковая. Каб вырасціць з
“нуля” да стану спеласці адно дрэва, трэба — у сярэднім, зразумела — “укласці”
каля 4 долараў ЗША і… 50-80 гадоў часу. Прыбытак жа ад атрыманай з яго
дзелавой драўніны складзе ў лепшым выпадку 30.000 рублёў, што супастаўна з
даходнасцю банкаўскага ўкладу на тую ж першапачатковую суму і такі ж тэрмін.

Праўда, у выпадку з лесам даход канкрэтнай
лесагаспадарчай установы ўяўляе сабой толькі тую частку агульнага дывідэнду,
якую можна больш-менш дакладна вымераць. А ёсць жа яшчэ чыстае паветра,
магчымасць адпачываць на ўлонні прыроды, збіраць грыбы-ягады, без абмежаванняў
карыстацца іншымі выгодамі, якія для чалавека можа стварыць толькі лес.