Па інфармацыі інспекцыі прыродных рэсурсаў і
аховы навакольнага асяроддзя, за апошнія гады ў Беларусі назіраецца скарачэнне
арэалу існавання мядзведжай цыбулі. Нягледзячы на дастаткова працяглы час
знаходжання пад аховай — гэты від унесены ў Чырвоную кнігу Беларусі ў 1981 годзе
— яна актыўна нарыхтоўваецца насельніцтвам.

Найбольшы ўрон нанесены папуляцыям, якія
знахо-дзяцца ў Брэсцкай і Мінскай абласцях. На Асіповіччыне, дзе ўзгаданая
расліна сустракаецца дастаткова часта, скарачэнне колькасці яе асобін пакуль не
адчуваецца, аднак паступовы рэгрэс прадукцыйнасці плантацый усё ж існуе:
нарыхтоўкі вядуцца вельмі траўматычным спосабам, які яшчэ і пера-шкаджае
раслінам размнажацца.

Трэба прызнаць, што існуючая сістэма барацьбы з
незаконным зборам мядзведжай цыбулі не можа стрымаць усіх жадаючых зарабіць на
гандлі вясеннім далікатэсам. Апошніх не палохае нават перспектыва выплаты
штрафу ў памеры да 200 базавых велічынь за збор расліны-чырванакніжніцы і да 10
— за яе продаж. Зменшыць пагрозу знікнення рэдкага віду магла б адмова
неабыякавых да стану роднай прыроды землякоў ад набыцця мядзведжай цыбулі ў
зборшчыкаў-нелегалаў.

Вясна — перыяд яшчэ адной традыцыйнай “забавы”:
выпальвання сухой травы. Усе выдатна разумеюць, што палы наносяць прыродзе
вялікія страты, аднак незаконнасць такой “забавы” стрымлівае не ўсіх.

Сёлетняй — вільготнай і працяглай — вясной ад
правядзення сельгаспалаў шкоды будзе больш, чым звычайна: чым пазней яны
праводзяцца, тым большая колькасць асобін жывёл і маладых раслін будзе знішчана
агнём…