Пасада старшыні мясцовага Савета патрабуе ад чалавека быць у курсе ўсіх падзей, якімі жыве падначаленая яму тэрыторыя, накіроўваць яе развіццё і шукаць спосабы вырашэння бясконцай чарады вялікіх ды малых праблем. Таму не будзе перабольшваннем лічыць, што справы кіраўніка пасялковага самакіравання Алега Лук’яненкі
і ёсць, па вялікім рахунку, справы ўсяго пасёлка. Ну і нагода задаць вынесенае ў загаловак пытанне
слушнае: адзін год скончыўся, другі пачынаецца…

— Сёлетні час для ялізаўчан
будзе важным, — адразу канцэнтруе ўвагу на
галоўным галава пассавета, — восенню СЗАТ “Шклозавод Ялізава” адзначыць сваё 100-годдзе. Натуральна, ужо пачынаем пакрысе рыхтавацца, хаця і нельга сказаць, што нашы “юбілейныя” планы істотна адрозніваюцца ад леташніх. Жыццё пасёлка нібы цячэнне ракі, рэзкія перапады ды павароты ў ім увогуле
непажаданыя.

Сучаснае Ялізава мае даволі значны эканамічны патэнцыял: горадаўтвараючае прадпрыемства забяспечвае работай 645 чалавек, ВГПУП “Ялізава–Сэрвіс” — 269, каля 130 — ТАА “Еліпак”, ТАА “Інтаррэмтэхнік”, ЗАТ “АТЭС”, УП “Сінькевіч М.Е.” і Акцябрскае лясніцтва — 23, аўтазаправачная ды газаразмеркавальная станцыі — 8. У рэальным сектары эканомікі задзейнічана каля 1.100 пасялкоўцаў — амаль 70 працэнтаў ад агульнай колькасці эканамічна актыўнага
насельніцтва.

Да добрага прызвычайваешся хутка, так што сэрвісу многа не бывае. Але на сёння да паслуг пасялкоўцаў 6 магазінаў, 5 гандлёвых павільёнаў, міні–рынак, аддзяленні паштовай сувязі і ААТ “АСБ Беларусбанк”. У мінулым годзе адчыніліся магазін аўтазапчастак ПУП “АўтаДзіў” і кафэ ТДА “Кастанер” на 60 месцаў. Гэта ў пэўным сэнсе знакавыя і доўгачаканыя падзеі. Крыху ўтрырую, але аўтамабіляў у Ялізаве амаль столькі ж, колькі і жыхароў, таму патрэба ў запчастках стаіць заўсёды востра. Ну а адсутнасць у нас кафэ доўгі час заставалася адной з самых балючых “кропак” грамадскага харчавання і сацыяльнай сферы. З задавальненнем дадам, што кафэ радуе наведвальнікаў не толькі добрай кухняй ды ўтульнасцю, але і вельмі дэмакратычнымі цэнамі.

Сродкі бюджэту выканкамаў
мясцовых Саветаў заўсёды былі абмежаваныя, таму вопыт ашчаднага карыстання рэсурсамі ў органаў савецкай улады назапашаны немалы, і да ўдзелу ў Годзе беражлівасці мы падрыхтаваныя. Да прыкладу, летась на 10 працэнтаў зменшылі энергаспажыванне вулічнага асвятлення, што зусім не мала.

А ўвогуле сёлета Ялізава чакаюць важныя падзеі: запланавана будаўніцтва пажарнага дэпо, рэканструкцыя ачышчальных збудаванняў і водаправода ў мікрараёне “Прыгарадны”. Будзем спадзявацца, што гэтыя планы здзейсняцца ў поўным аб’ёме. Ну а калі ў ТАА БКС “БелБуд”, што ў свой час выкупіла былы прафілакторый шклозавода “Кастрычнік”, справы працягнуць ісці добра і яно здолее пераўтварыць закінуты будынак у аздараўленчы цэнтр, то будзе зусім выдатна.