У сельсавеце дзейнічаюць 3 вясковыя камітэты: у Замошшы, Вяззі і Малой Гарожы. Яны не толькі кантралююць жыццё падуладных тэрыторый, але і выконваюць «функцыю” радыстаў: кіраўнікі камітэтаў пастаянна на сувязі са старшынёй сельсавета Анатолем Гедраўцом, якому і паведамляюць аб усіх патрэбах жыхароў.

Замошша
У камітэце тры чалавекі. Але, як кажа яго старшыня Наталля Барадаўка, калі патрабуецца, дапамагае ўся вёска: разам прыбіраюць вуліцы, парк, грамадскія будынкі і г.д. Генеральныя ўборкі тут ладзяцца па пятніцах.
У Замошшы балючай тэмай застаюцца бяздомныя сабакі, якія перашкаджаюць і паштальёнам разносіць пошту і накідваюцца на прахожых. Нягледзячы на тое, што пару тыдняў таму «Райсервіс” ужо спрабаваў адстраляць бадзяжных чатырохногіх, праблема да канца не знята…

Вяззе
Камітэт у складзе 13 чалавек «трымае пад кантролем” 8 населеных пунктаў. Яго дзейнасць курыруе Людміла Андрыевіч. Паводле яе слоў, асноўная задача «камітэтчыкаў” у тым, каб падтрымліваць належны стан тэрыторыі і, адпаведна, належны імідж аграгарадка. Таму тут актыўна займаюцца справай азелянення: вуліцы ўпрыгожаны клумбамі і кустамі.

Першае месца па праблемнасці займаюць дарогі: частка іх патрабуе асфальтаванай «вопраткі”.

Балючае пытанне — адсутнасць у многіх жыхароў акуратнасці. Увогуле, за сметнікамі па ўласнай ініцыятыве «замацавана” Лілія Свірыдовіч, а прыбіраюць «дабро” нявыхаваных жыхароў самі супрацоўніцы камітэта.

Малая Гарожа
Старшыня Iрына Хаменка кажа, што галоўную праблему вёскі камітэт сам вырашыць не ў стане, бо гэта — недастатковае медыцынскае абслугоўванне. У вёсцы адсутнічае аптэка, а медработнік прыязджае сюды толькі ў першы і трэці чацвер месяца. Старым жа людзям патрабуецца яго прысутнасць хаця б некалькі разоў на тыдзень…

У справах добраўпарадкавання са сваёй бензапілой актыўна дапамагае вясковец Уладзімір Шумскі, а з Людмілай Патапейка дзеліць дагляд за вёскай старшыня. У мінулым годзе па іх «наводцы” Савет прыбраў тут старыя таполі, якія пагражалі некаторым будынкам і іх гаспадарам.