З кожным годам усё выразней змяняецца ўклад жыцця вясковага насельніцтва. Даўно ўжо не здзівіш калгасніка камфартабельным домам з водаправодам і газавым ацяпленнем, асфальтаванай вуліцай, тыповай школай, сучасным гандлёвым цэнтрам і г.д. Такое рашуча мяняе жыццёвы ўклад кожнага вяскоўца.

Усе гэтыя змяненні — яскравыя прыклады рэалізацыі дзяржаўнай палітыкі ў дачыненні да вёскі і яе жыхароў. Вялікая роля ў аднаўленні вясковага жыцця належыць і мясцоваму самакіраванню, у першую чаргу — дэпутатам мясцовых Саветаў.

Доўгі вопыт грамадскай работы дырэктара Лапіцкай СШ, дэпутата райсавета Мікалая Пісьмянкова — а гэта тры дэпутацкія скліканні — многаму яго навучыў. Больш уважліва ставіцца да праяў грамадскага жыцця і сацыяльных праблем, якія існуюць на выбарчым участку, да тых пытанняў, якія шчыра хвалююць людзей, ад якіх залежыць іх дабрабыт, настрой, адносіны да жыцця, улады.

— А яшчэ — разважлівасці і дыпламатычнасці, — гаворыць Мікалай Уладзіміравіч, — бо ў юнацтве быў непрымірымым, бескампрамісным максімалістам, дзеля прынцыповасці гатоў быў ахвяраваць многім. Зараз стаў больш памяркоўным і цярпімым. Навучыўся выслухоўваць, ва ўсім шукаць рацыянальнае зерне. Калі ў акрузе з людзьмі размаўляю, стараюся зразумець: чалавек проста хоча выгаварыцца ці яго турбуе праблема, якая сапраўды не вырашаецца па нейкай прычыне.

Лапіцкі сельсавет у раёне — самы буйны, і развіваецца ён дынамічна. Сваю спецыфіку надае і дыслакаванне ў найбольш буйных вёсках вайсковых часцей Асіповіцкага гарнізона. Выбаршчыкі ідуць да свайго дэпутата з рознымі бытавымі і іншымі праблемамі: добраўпарадкаванне населенага пункта, рамонт дарогі, працяг рэйсавага маршруту аўтобуса і абсталяванне аўтобуснага прыпынку, адкрыццё грамадскай лазні, уладкаванне на працу… Шэраг з іх станоўча вырашаны дзякуючы намаганням менавіта іх абранніка. Галоўнае ў грамадскай рабоце гэты чалавек засвоіў, як кажуць, назаўсёды: сярод выбаршчыкаў няма другарадных персанажаў. Хаця і не ўсё з задуманага па розных прычынах удалося давесці да канца: з нецярпеннем жыхары пасёлка Сасновы чакаюць вырашэння пытання з пітной вадой, спа-дзяюцца на аднаўленне працы Сасноўскай аптэкі…

— Многія лічаць, што дэпутат павінен валодаць здаровым цынізмам, адсякаць праблемы, якія не адносяцца да яго абавязкаў. Думаю, што гэта не зусім правільна. Дэпутат не павінен пакідаць чалавека сам-насам са сваімі праблемамі, а дапамагчы ў іх вырашэнні. У мяне, як і ў многіх другіх калег, такога няма — і дзякуй Богу. Зварот кожнага выбаршчыка мы лічым галоўным. Спадзяюся, і абраннікі новага склікання будуць таксама ўкладваць у дэпутацкія абавязкі не толькі час, але і душу, — дзеліцца сваімі развагамі Мікалай Уладзіміравіч.

Вы згодны, што яго словы можна лічыць свайго роду наказам для тых ініцыятыўных, неабыякавых лю-дзей, якія будуць прадстаўляць і адстойваць інтарэсы сваіх землякоў у прадстаўнічай уладзе раёна?
Тамара ВАЛАДЗЬКО.