На парадак дня семінара-вучобы па арганізацыі
работы камітэтаў тэрытарыяльнага грамадскага самакіраўніцтва горада Асіповічы,
які прайшоў 25 сакавіка, старшыня раённага Савета дэпутатаў Аляксандр Пузік
вынес 4 пытанні.

Напачатку ён падрабязна расказаў аб дзейнасці
раённага Савета і наогул сёлетнім стане спраў на Асіповіччыне, а потым спыніўся
на тым, што практычна могуць зрабіць дэпутаты і іх памочнікі з узгаданых
камітэтаў дзеля таго, каб жыццё роднага горада з кожным днём толькі
паляпшалася. Галоўная думка прамоўцы — ніхто не павінен быць пасіўным, абыякава
ставіцца да таго, што адбываецца побач. Наш горад — наш агульны дом, і нам
трэба пастаянна сустракацца з людзьмі і трымаць іх у курсе спраў па ўсіх важных
пытаннях — сацыяльна-эканамічных, культурнага жыцця і г.д. I па меры сіл і
магчымасцей уплываць на жыццё рэгіёна, рэгулярна інфармаваць мясцовую ўладу
наконт існуючых праблем, каб тыя паступова здымаліся.

На шэраг пытанняў адказаў непасрэдна Аляксандр
Віктаравіч, многія тлумачэнні далі наступныя прамоўцы — кіраўнікі ДУКВП
«Райсэрвіс” Аляксандр Маслаў і КДУП «Адзіны разліковы цэнтр” Анатоль Грыгор’еў,
а таксама намеснік начальніка райаддзела міліцыі Мікалай Гайваронскі.

Як адзначыў пры падвя-дзенні вынікаў работы
старшыня райсавета дэпутатаў, падобныя мерапрыемствы будуць праводзіцца мінімум
двойчы на год. Прычым дзверы ў мясцовы «клуб самакіраўніцтва” па-ранейшаму
адчынены для ўсіх тых, каму неабыякава жыццё і развіццё роднага горада.