Напачатку снежня мінулага года ААТ “Рыбгас
“Свіслач” уступіла ў валоданне Асіповіцкім вадасховішчам на правах арэнды.

Новы арандатар пачаў сваю гаспадарчую дзейнасць
з зарыблення моладдзю таўсталобіка, больш 500 кг якога было набыта за грошы,
выдзеленыя з раённага фонду аховы прыроды, і аднаўлення арцельнай (прамысловай)
лоўлі.

За месяц было здабыта і рэалізавана каля 2,5 тон
таварнай рыбы, што складае 22,7% ад гадавой квоты, выдзеленай у адпаведнасці з
навуковым абгрунтаваннем гаспадарчай эксплуатацыі рыбных рэсурсаў гэтага
вадаёма.

Вяртанне вадасховішчу статусу арандуемых
угоддзяў, натуральна, выклікала ў рыбаловаў-аматараў шэраг пытанняў, на якія
“Вытокі” папрасілі адказаць дырэктара прадпрыемства Аляксандра Няхая.

— Ці былі ўведзены рыбгасам нейкія асаблівыя
правілы для ўпарадкавання аматарскага рыбалоўства пасля пачатку гаспадарчай
эксплуатацыі вадаёма?

— Пакуль ніякіх мер, што выходзяць за межы
агульнавядомых правілаў аматарскага рыбалоўства, не ўведзена. У прыватнасці,
устаноўлена норма вылаву да 5 кг рыбы ў дзень на чалавека, забаронена вя-дзенне
інтэнсіўных відаў лоўлі…

На гэты год запланавана зарыбленне карпам, белым
амурам, стракатым таўсталобікам. Пасля чаго, верагодна, на пэўны час вылаў
гэтых відаў рыбы будзе абмежаваны.

— Што Вы думаеце наконт вяртання да рэжыму
платнага рыбалоўства?

— Зараз наша прадпрыемства вывучае такую
магчымасць, аднак рабіць рыбалку платнай на вялікім вадаёме ёсць сэнс у
выпадку, калі рыбгас будзе праводзіць рэгулярныя зарыбленні і здолее
распрацаваць зручную сістэму па продажу ліцэнзій на права лоўлі.

— Наколькі дзейсна рыбгас можа абараняць
арандуемы вадаём ад браканьераў?

— Поспех у гэтай справе дасягаецца, калі
кантроль за выкананнем правілаў рыбалоўства вядзецца сістэматычна на працягу
дастаткова доўгага часу. З моманту ўступлення ў права арэнды прайшло некалькі
тыдняў, а гэтага недастаткова, каб вывучыць сітуацыю і пачаць нейкія актыўныя
дзеянні. Да таго ж рыбгас не мае права самастойна складаць пратаколы на
за-трыманых парушальнікаў, таму ў барацьбе з браканьерствам плануем умацоўваць
і развіваць супрацоўніцтва з інспекцыяй аховы жывёльнага і расліннага свету,
органамі аховы правапарадку.

— Ці прымае ўдзел арандатар у добраўпарадкаванні
прыбярэжнай зоны вадасховішча?

— Рыбгасу адведзены ўчастак берага ад Вяззеўскіх
могілак да вёскі Зборск, уздоўж якога, прынамсі, і ставяць свае сеткі брыгады
арцельшчыкаў. Для ачысткі берага ад смецця напрыканцы снежня быў праведзены
суботнік, і зараз да яго санітарнага стану ў кантралюючых органаў прэтэнзій
няма.

Дзмітрый САЎРЫЦКI.