Некаторыя
маладыя людзі, паступіўшы ў ВНУ, з часам расчароўваюцца ў сваім выбары, але
пакідаць вучобу ўсё ж не вырашаюцца. Толькі сёння можна і не чакаць, пакуль
пройдзе пяць гадоў, каб атрымаць магчымасць зноў паступіць на іншую
спецыяльнасць. Выхад са становішча — паралельная адукацыя.

Спачатку
вызначымся: ці варта адрозніваць паняцці «паралельная адукацыя” і «другая
вышэйшая адукацыя”. Аб другім ідзе гаворка, калі чалавек мае на руках дыплом і
хоча атрымаць яшчэ адну спецыяльнасць. А вось паралельная адукацыя — выдатная
магчымасць вучобы для студэнта старэйшых курсаў дзённай формы навучання: другую
вышэйшую студэнт атрымлівае завочна, і пры гэтым яго адразу ж залічваюць на
другі курс.

Што для гэтага
неабходна? Найперш — сур’ёзныя намеры, вы павінны дакладна вырашыць: хочаце
атрымаць «оптам” дзве прафесіі ці не? А для гэтага, канешне, трэба добра
вучыцца. Паводле дзеючых правілаў, магчымасць атрымліваць паралельную адукацыю
маюць толькі тыя студэнты, у якіх у заліковай кніжцы няма ні адной ацэнкі ніжэй
сямі балаў. Спатрэбяцца час і цярпенне для таго, каб сабраць па-трэбныя даведкі
і дазволы. Потым, калі пачнецца чарговая кампанія па прыёме студэнтаў у
вышэйшыя навучальныя ўстановы, неабходна будзе падаць у прыёмную камісію,
акрамя звычайнага набору дакументаў, яшчэ і акадэмічную даведку са сваёй ВНУ, а
таксама дазвол дэкана ці рэктара з асноўнага месца вучобы.

Яшчэ адзін
нюанс. Звычайна на паралельную адукацыю па кожнай спецыяльнасці вылучаецца да
пяці месцаў штогод, і калі жадаючых будзе больш, то арганізуецца конкурс.
Прыёмная камісія тады звяртае ўвагу на сярэдні бал акадэмічнай даведкі. Гэта
яшчэ адна прычына, каб з першага ж курса асноўнага факультэта вучыцца настолькі
добра, наколькі магчыма.

Такая
адукацыя, канечне, стрэс. Калі вас залічаць, то будзе неабходна здаць
акадэмічную розніцу паміж навучальнымі планамі дзвюх спецыяльнасцей. Плюс, калі
ў звычайнага студэнта ў год дзве сесіі, то ў вас іх будзе чатыры, значыць
хранічны недахоп часу і фізічная стамляльнасць вам забяспечаны.

Аднак у
паралельнай адукацыі ёсць свае плюсы. Па-першае, вы студэнт двух факультэтаў,
значыць, у вас больш сяброў і знаёмых. Па-другое, пры добрасумленнай вучобе вы
інтэлектуальна ўзбагачаеце свой узровень, прычым веды, атрыманыя на адным
факультэце, магчыма, дапамогуць і на іншым. Па-трэцяе, навучыцеся разумна
размяркоўваць час — якасць, якая вельмі спатрэбіцца ў жыцці. Па-чацвёртае,
сэканоміце час. Напрыклад, калі пасля трэцяга курса захочаце атрымаць
паралельную адукацыю, то ў цэлым пойдзе 7 гадоў на атрыманне двух дыпломаў, а
калі вырашыце атрымліваць другую вышэйшую адукацыю пасля атрымання першага
дыплома, то выдаткі — у лепшым выпадку — 8 гадоў. Па-пятае, кошт навучання ніжэй,
чым пры атрыманні другой вышэйшай. І, нарэшце, галоўнае, уявіце — у вас два
дыпломы! А такі факт не толькі парадуе вашых будучых работадаўцаў, але і
прымусіць іх ставіцца да вас сур’ёзна.