Асіповіччына не богам забыты край, а сотня
кіламетраў да сталіцы толькі спрыяе рэгулярнаму наведванню нашых мясцін
чыноўнікамі самага высокага рангу. Вось і ў рабоце нядаўняга пасяджэння
райвыканкама 21 верасня (гл. «АК” № 83 ад 27.09.2011) прымала ўдзел нямала
высокіх пасадавых асоб. I яны ў той дзень пастараліся як мага больш падрабязна
пазнаёміцца з абстаноўкай у рэгіёне.

Старшыня Вышэйшага гаспадарчага суда Рэспублікі
Беларусь Віктар Камянкоў разам з кіраўніком абласнога гаспадарчага суда
Віктарам Багуслаўскім правялі прыём грамадзян, а таксама дэталёва азнаёміліся з
дзейнасцю нашай дзіцяча-юнацкай спартыўнай школы. Асабліва Віктара Сяргеевіча
цікавілі пытанні, звязаныя з развіццём у нас баскетбола. I гэта невыпадкова:
чалавек узначальвае Беларускую федэрацыю баскетбола.

Старшыню Пастаяннай камісіі Савета Рэспублікі па
эканоміцы, бюджэту і фінансах Вадзіма Папова землякам прадстаўляць наўрад ці
трэба: шмат гадоў аддаўшы працы ў рэгіёне, ён і сёння неабыякава ставіцца да
жыцця асіпаўчан. Вось і ў вераснёўскі прыезд Вадзім Аляксандравіч застаўся
верным сабе, не абмінуўшы на гэты раз калектыў СП ААТ «Дах”. Што ж, яго
кіраўніку Мікалаю Калтунову ёсць што і расказаць, і паказаць…