Уласным конкурсам жаночай прыгажосці можа
пахваліцца не кожны райцэнтр, у Асіповічах жа гэтае мерапрыемства ўжо
“прыжылося” добра. Сёлета культурнае жыццё нашага рэгіёна разнастаіў яшчэ і
конкурс “Містар-2011”
— 18 лютага на сцэне РЦК за ганаровы тытул змагаліся пяць юнакоў з Асіповіч і
адзін з Лапіч.

Кожны з іх падрыхтаваў даволі арыгінальную візітную
картку. Хлопцы рабілі стаўку на свой талент — чытанне рэпа, спевы, харэаграфію,
уменне іграць на гітары і г.д., пачуццё гумару і нестандартнае выкарыстанне
слайдаў.

Дэфіле ў дзелавых і спартыўных касцюмах вельмі
ўразіла суддзяў. Iрына Раманчук нават адзначыла: “Калі б у нашым горадзе было
мадэльнае агенцтва, канкурсанты без праблем маглі б туды ўладкавацца!”

Акрамя таго, удзельнікаў чакалі разнастайныя
выпрабаванні: як мага больш часу пракруціць на таліі абруч, хутка адказаць на
каверзныя пытанні, правільна завязаць гальштук за адну хвіліну. Самым эфектным
і прыгожым атрымаўся танцавальны конкурс. Разам з хлопцамі мінуэт выконвалі
дзяўчаты, якія прымалі ўдзел у леташнім конкурсе “Міс-Асіповічы”.

Журы прысудзіла ўдзельнікам наступныя намінацыі:
Валерыю Бесарабаву — “Містар-Стыль”, Iгару Iванову — “Містар-Элегантнасць”,
Дзмітрыю Тарвініну — “Містар-Знаходлівасць”, Уладзіславу Раманоўскаму —
“Містар-Абаяльнасць”, Паўлу Дзеўгуцю — “Віцэ-Містар”. А “Містарам-2011” стаў Максім Малейка з
СШ № 1.