Горка! Залатыя юбіляры 12.01.10, №2

Горка!
Залатыя юбіляры
Галіна і Iван Корсак з Ліпеня ўпэўнены: сакрэт шчаслівага сямейнага даўгалецця — у задавальненні ад жыцця.
26 снежня 1959 года ў Ясенскім сельсавеце быў зарэгістраваны шлюб гэтай паважанай пары. У іх не было шыкарнага вясельнага картэжу і шумнага трохдзённага застолля — была сціплая вячэра, куды запрасілі самых блізкіх. Напэўна, з пункту погляду сучасных маладых, якія сёння імкнуцца дзеля будучага шчасця ўсё дакладна рабіць паводле традыцый, гэта нонсенс. Але Галіна Iванаўна і Iван Iванавіч даказалі сваім жыццём, што самае галоўнае не знешнія атрыбуты, а ўнутраны змест. Яны пражылі разам 50 гадоў і зусім нядаўна адсвяткавалі — ізноў такі даволі сціпла — залатое вяселле.
Усё жыццё пражылі Корсакі ў Ліпені, адпрацавалі на зямлі. Выгадавалі цудоўных дзяцей — сына і чатырох дачок. Сёння род Корсакаў працягваюць 14 унукаў і два маленькія праўнукі Дзіма і Карына.