Гісторыя страхавой справы непарыўна звязана з
гісторыяй краіны. У ёй знаходзілі адлюстраванне ўсе змяненні эканамічнай
палітыкі дзяржавы, усе праблемы і дасягненні нашага развіцця. У гісторыі
Белдзяржстраха былі ўзлёты і падзенні, неаднаразова змяняўся яго статус, іншым
станавіўся змест дзейнасці. Пастаянным жа было адно: у любых
сацыяльна-палітычных і эканамічных умовах нацыянальнае страхаванне і яго
флагман — Белдзяржстрах — заўсёды служылі інтарэсам дзяржавы і народа,
садзейнічалі развіццю і ўмацаванню нацыянальнай эканомікі.

Мае агульны лёс са сваёй кампаніяй і
прадстаўніцтва Беларускага рэспубліканскага ўнітарнага страхавога прадпрыемства
“Белдзяржстрах” па Асіповіцкім раёне. Зараз у раённай структуры працуе 36
чалавек, з іх страхавых агентаў — 19.

Страхавая кампанія — гэта своеасаблівы сінтэз
“касы ўзаемадапамогі” і — у меншай ступені — гандлёвай арганізацыі. Скажаце,
што выступае ў якасці тавару? Страхавыя паслугі. Якіх, дарэчы, зараз Белдзяржстрах
прапануе каля сотні. Гэта страхаванне ад ня-шчасных выпадкаў і хвароб,
асабістага транспарту, жылля, хатняй маёмасці, жывёлы і многае іншае. Словам,
няма толькі страхоўкі датычна асабістых узаемаадносін людзей, а ўсё астатняе
можна застрахаваць.

Калектыў у нашым Белдзяржстраху стабільны.
Працуе і нямала моладзі (зараз, напрыклад, 5 чалавек знаходзяцца ў дэкрэтным
адпачынку), і людзей старэйшага ўзросту. Кожны страхавы агент мае свой участак,
у які ўваходзяць не толькі пэўныя прадпрыемствы і вуліцы райцэнтра, але і цэлыя
сельсаветы. Канкурэнцыя сярод работнікаў заснаваная менавіта на прафесійным
запале: толькі ад цябе самога залежыць, колькі будзе важыць твой “страхавы
партфель”.

Вядома, чым больш у ім дагавораў, тым лепш і для
кампаніі, і для цябе асабіста. У страхаўшчыка заўсёды ёсць магчымасць зрабіць
сваю работу больш выніковай, трэба толькі свое-часова і рэгулярна падключаць
энтузіязм. Канечне, страхавы агент павінен валодаць многімі якасцямі, быць і
псіхолагам, і гандляром, і сябрам. Галоўнае ж у паспяховай дзейнасці — спагада
да кліентаў. Важна ўмець растлумачыць чалавеку, чаму страхаванне — рэч
карысная. Зразумела, большасць з нас аб праблемах задумваецца па меры іх
узнікнення, аднак людзі практычныя перакананы: няхай лепш страхавых выпадкаў не
здараецца, але мы павінны быць да іх гатовы.

Якіх вынікаў дасягнула сумесная праца
асіповіцкіх страхаўшчыкоў? За студзень-кастрычнік складзена 16.394 дагаворы,
адбылося 2.807 вы-плат — каля 2,3 мільярда рублёў. У казну раённага
Белдзяржстраха паступіла каля 3,2 мільярда рублёў. Тэмпы росту да паказчыкаў
мінулага года складаюць 148%. Супрацоўнікі кампаніі ўпэўнены, што яшчэ ёсць
рэзервы павышэння ўзроўню развіцця страхавання. Абагульнена кажучы, гэта
павелічэнне ахопу насельніцтва страхавымі паслугамі, а таксама ўзрастанне сум
страхавых узносаў.

Ці робіць страхаванне наша жыццё больш
бяспечным? Гэта наўрад ці, а вось больш надзейным і абароненым — дакладна.
Дарэчы, для тых, хто некалі ў нестабільныя 90-я гады пакрыўдзіўся на
Белдзяржстрах за нявыплату сум па доўгачасовым страхаванні, заключаным у 80-я:
страхаўшчык пра вас памятае, усе дадзеныя захаваныя. Не выключана, што ўрэшце
будзе прынята рашэнне па кампенсаванні страчанага.

“Адчуйце асалоду спакою” — такі слоган абраны
зараз кампаніяй з 90-гадовай традыцыяй. Хіба ёсць штосьці важнейшае за спакой?

Валянціна КОРБАЛЬ.