Наш раён, як адзін з буйнейшых прамысловых цэнтраў
вобласці, мае шэраг характэрных асаблівасцей прыродакарыстання. I адпаведна —
пэўныя складанасці ў рабоце па ахове навакольнага асяроддзя. Якія ж праблемы
хвалявалі мясцовых эколагаў у мінулым годзе? Што ім удалося зрабіць для
паляпшэння стану прыроды нашага краю?

Паветра

Летась аб’ём выкідаў шкодных рэчываў у атмасферу
склаў прыблізна 8.000 тон, прычым амаль 80% іх прый-шлося на 5 прадпрыемстваў:
СЗАТ “Шклозавод Ялізава” — 184 т, УКП ЖКГ — 340 т, Асіповіцкая міні-ЦЭЦ — 499
т, ААТ “АЗАА” — 62 т, УМГ ААТ “Белтрансгаз” — 5.100 т.

Найбольш істотны рэалізаваны праект у галіне аховы
паветра — увод у эксплуатацыю сістэмы кагенерацыі ўпраўлення магістральных
газаправодаў. Узгаданая сістэма дазваляе ўлаўліваць значную колькасць
прыроднага газу, які выкідваецца ў паветра з-за асаблівасцей тэхналогіі
захавання ў падземных сховішчах. Чакаецца, што чатыры ўстаноўленыя на УМГ
кагенератары дазволяць прадпрыемству скараціць аб’-ём атмасферных выкідаў
прыкладна на 1.000 тон у год. Прычым захаваны прыродны газ будзе перапрацаваны
ў цяпло і электраэнергію.

Вада

У горадзе і раёне дзейнічаюць 266 свідравін і 6
паверх-невых водазабораў. Спажыванне вады ў нас застаецца стабільным і
трымаецца на ўзроўні 19 млн. м3 у год. За-стаецца на прымальным — не ствараючым
пагрозы існаванню жывёл і раслін — і аб’ём трапляючых у вадаёмы шкодных
рэчываў. Больш таго. Летась у выніку сумесных дзеянняў экалагічнай інспекцыі,
органаў пракуратуры і мясцовай выканаўчай улады быў прыпынены выкід сыроваткі ў
каналізацыю ААТ “Асіповіцкі малочны камбінат”, што зменшыла паступленне ў
гарадскія ачышчальныя збудаванні гэтай шкоднай для прыроды вадкасці на 250 тон
штомесячна. Пэўныя зрухі да лепшага ў мінулым годзе адбыліся і ў выкананні
рэжыму ўтрымання ахоўных зон вадаёмаў. Парушэнняў ва ўзгаданай сферы было 13, у
2008 г. — 38, у 2007 — 60…

 Тым не менш,
навядзенне парадку ў галіне карыстання воднымі рэсурсамі на сёння можна лічыць
найбольш актуальным накірункам дзейнасці экалагічнай інспекцыі.

Сярод найбольш істотных праблем асіповіцкага
водакарыстання можна назваць недастатковую забяспечанасць водазабораў прыборамі
ўліку: па стане на пачатак 2010 г. улік спажытай вады вядзецца толькі на 70%
мясцовых водазабораў.

Пакуль яшчэ не цалкам удалося арганізаваць атрыманне
суб’ектамі гаспадарання дазволаў на спецыяльнае водакарыстанне. Сур’ёзную
заклапочанасць выклікае стан размешчаных у Асіповічах, пасёлку Сасновы і рабочым
пасёлку Ялізава ачышчальных збудаванняў, аднак з-за дэфіцыту сродкаў рэальных
змен у іх тэхнічным стане можна чакаць у лепшым выпадку ў 2011-2015 гадах.

Адыходы

За год у гаспадарчы абарот было вернута 2,3 тыс. тон
металічнага лому, 389 т паперы, 64 — шклабою, 50 — пластмас, 9,9 — тэкстылю, 10
тон ПЭТФ-бутэлек. Адчувальны ўклад у дасягненне ўзгаданых паказчыкаў унесла
існаванне ў горадзе 34 кантэйнерных пляцовак для збору асобных відаў адыходаў і
работа станцыі дасарціроўкі ДУКВП “Райсервіс”.

У раёне створана сетка з 43 міні-палігонаў і 80 пляцовак
для часовага ўтрымання цвёрдых бытавых адыходаў, дзейнічае гарадскі палігон
ЦБА. Аднак практыка паказала, што створаная раней эксплуатацыя аб’ектаў
захавання адкідаў аказалася празмерна грувасткай і дарагой у карыстанні. З
гэтай нагоды сумесна з сельвыканкамамі летась пачалася работа па аптымізацыі
колькасці і размяшчэння міні-палігонаў. Яе завяршэнне запланавана на май 2010
года.

Віталь НІКАЛАЙЧЫК,

начальнік інспекцыі прыродных рэсурсаў

і аховы навакольнага асяроддзя.