З 1 студзеня змяніліся правілы пасажырскіх перавозак на чыгунцы. Сэнс найбольш істотных для землякоў транспартных навацый тлумачыць загадчык білетнай касы станцыі Асіповічы Галіна КАМЕЙКА:

— Скараціўся тэрмін дзеяння білетаў на праезд «туды і назад” у дызель- і электрацягніках — па сучаснай класіфікацыі, паяздах гарадскіх і рэгіянальных ліній эканомкласа. Калі раней білетам «туды і назад” фактычна можна было карыстацца на працягу двух сутак, то зараз тэрмін дзеяння разавых праязных дакументаў мае дакладныя межы: да дзвюх гадзін наступных ад даты продажу сутак.

Кошт абанементнага білета на прад’яўляльніка і імяннога льготнага білета сёння вызначаецца з разліку 18 паездак «туды” і столькі ж назад, білета выхаднога дня — 8 паездак у абодва бакі.

Па білетах, набытых для праезду ў гарадскіх электрацягніках, дазволена ездзіць і ў паяздах рэгіянальных ліній эканомкласа — у межах азначанага ў праязным дакуменце тарыфнага пояса.

Знаходжанне ў вагонах веласіпедаў і дамашняй жывёлы абмежавана месцамі, якія азначаны спецыяльнымі піктаграмамі.

Скасаваны скідкі для бацькоў з дзецьмі і для перавозкі груп вучняў, якія раней дзейнічалі ў перыяд з 1 кастрычніка па 30 красавіка. Пасажыр, які вязе дзіцё ва ўзросце да 10 гадоў, абавязаны мець дакумент, які пацвярджае ўзрост непаўналетняга.

Забаронена таксама курэнне ва ўсіх цягніках, акрамя паяздоў міжнародных зносін.