«Я выйшаў з трох гадзін!» —

менавіта такія выклікі можна было пачуць у мінулую суботу на гарадской плошчы.

Падстава? Там праходзіў традыцыйны — ужо 33! — Асіповіцкі міжнародны марафон, які сабраў каля 700 аматараў бегу. Акрамя беларусаў з розных куткоў краіны, на старт выйшлі і 11 расіян, а ў якасці галоўнага суддзі выступіў Аляксандр Гоцкі — удзельнік марафону на Алімпіядзе-76 у Манрэалі і адзін з лепшых марафонцаў былога Савецкага Саюза.

Першы забег — самы масавы. У ім прынялі ўдзел каля 500 навучэнцаў школ горада і раёна. Пераможцамі ў малодшай узроставай групе (6-8 класы) сталі Дзмітрый Назараў (Карытнае) і Зарына Рахімава (Ясень), а сярод старшакласнікаў — Мікіта Цэдрык (Ліпень) і Святлана Калячка (Каменічы).

На дыстанцыі 3 кіламетры ва ўзроставай групе 80 гадоў і больш беглі асіпаўчанін Барыс Ліпскі, бабруйчанін Пётр Аўласенка і мінчанка Тамара Новікава — і ўжо гэта, пагадзіцеся, перамога!

Дыстанцыю 15 кіламетраў выбралі 64 мужчыны і 24 жанчыны. Нашы 22-гадовая Ганна Лятун стала сёмай у сваёй узроставай групе з вынікам 1 гадзіна 16 хвілін 42 секунды, а Сяргей Папкоў, якому 36 гадоў, заняў 8 месца ў групе, фінішаваўшы з вынікам 1:06:31.

Класічны марафон — 42,195 кіламетра — пераадольвалі 59 чалавек, сярод якіх было 7 жанчын. Наша зямлячка Таццяна Гурская ў агульным заліку паказала другі вынік — 3:26:25, саступіўшы мінчанцы Наталлі Маліноўскай 12 хвілін і 22 секунды. А асіпаўчанін Дзмітрый Васіленка стаў трыццатым у агульным заліку, прабегшы дыстанцыю за 3:36:09. Лепшы ж вынік паказаў Генадзь Жаўронак з Беразіно — 2:36:19. Самы малодшы марафонец — мінчанін Аляксей Трахімчык, якому 21 год. А самыя старэйшыя — Віктар Кучынскі (Магілёў) і Леанід Калодка (Жодзіна), якім 78 і 80 гадоў адпаведна.

Стаераў, канечне, крыху падвяло надвор’е. Бегчы ў дождж і снег значна цяжэй, і нават далёка не ўсе гледачы і балельшчыкі дачакаліся заканчэння спаборніцтваў. Але ўдзельнікі засталіся задаволенымі мерапрыемствам, выказвалі шчырыя падзякі арганізатарам спартыўнага свята. I абяцалі прыехаць да нас у будучым!

Фота Марыі ТАЛЕЙКА.