Кошт свабоды

Напэўна многія, хто жыве па вядомым прынцыпе “ўкраў, выпіў — у турму”, ужо бывалі ў гэтым месцы. Аднак ніякай рамантыкі ў ізалятары часовага ўтрымання няма.

Сяргей Налівайка, начальнік ізалятара, паказвае калідор з масіўнымі дзвярыма, за якімі знаходзяцца камеры. Тут іх сем, і за кожнай вядзецца відэаназіранне. У камерах — двухузроўневыя ложкі з пасцельнай бялізнай. У ізалятары ёсць невялічкая кухня і памяшканне, дзе захоўваюцца рэчы затрыманых. Душ — раз на тыдзень, харчаванне — тры разы на дзень. Жыць можна, але такое жыццё хутчэй можна назваць існаваннем…

Надоўга тут не застаюцца: у ізалятар змяшчаюць да разгляду справы ў судзе тых, хто падазраецца ў здзяйсненні злачынства, падследных і інш. Таксама тут да трох дзён знаходзяцца злачынцы, для якіх запланаваны канвой — адсюль у асобным вагоне цягніка іх ноччу вязуць у СIЗА Бабруйска.

— Да нас трапляюць людзі, якія абвінавачваюцца ў розным крымінале, — распавядае Сяргей Яўгенавіч. — У асноўным гэта крадзеж, але нямала і тых, хто звязаны з наркотыкамі альбо абвінавачваецца ў нанясенні цяжкіх цялесных пашкоджанняў.

Усяго ў ізалятары працуе 10 чалавек. Асноўная задача IЧУ — не дапусціць уцёкаў, арганізацыя канвою, стварэнне належных умоў для знаходжання.

Тыя, хто ўжо адбылі сваё пакаранне, таксама не застаюцца без увагі. Iмі займаецца крымінальна-выканаўчая інспекцыя.

— Як толькі чалавек выходзіць з турмы альбо па рашэнні суда не пазбаўляецца свабоды, за ім усталёўваецца пільны кантроль, — уводзіць у курс спраў Андрэй Бабіч, намеснік начальніка РАУС па ідэалагічнай рабоце і кадравым забеспячэнні. — Iнспекцыя сочыць за тым, каб ён стаў на ўлік, плаціў устаноўленыя штрафы, выяўляе парушэнні абмежаванняў, прызначаных судом.

Яшчэ адна вялікая частка работы — прафілактыка. Начальнік крымінальна-выканаўчай інспекцыі Уладзімір Хашкоўскі прыводзіць прыклады:

— Калі чалавек згубіў пашпарт, яму дапамагаюць аднавіць дакумент і атрымаць часовую рэгістрацыю. Таксама з людзьмі працуюць службы сацыяльнай адаптацыі, цэнтр занятасці, які прапаноўвае працоўныя месцы.

Калі асуджаны знаходзіць сабе месца работы, стварае сям’ю і добрасумленна выконвае пастанаўленне суда, ён мае шанц зняцца з уліку датэрмінова.

Але гэта не ўсё. Iнспекцыя праводзіць і іншыя прафілактычныя мерапрыемствы: тлумачыць змяненні ў заканадаўстве, прапаноўвае дадатковае абучэнне для далейшага ўладкавання на працу, арганізоўвае сустрэчы са святарамі, дэманструе спецыяльныя фільмы пра, напрыклад, шкоду ад наркотыкаў.

Усяго ў інспекцыі 6 супрацоўнікаў, і пад іх апекай знаходзіцца амаль 590 чалавек. У кожнага з інспектараў свой накірунак работы.

— Асабліва хацелася б адзначыць нашых супрацоўнікаў Аляксандра Епіхава і Уладзіміра Шархунова, якія кантралююць усіх, хто стаіць на ўліку, — працягвае Уладзімір Уладзіміравіч. — Яны займаюцца вызваліўшыміся з месцаў пазбаўлення волі, у тым ліку асуджанымі за асабліва цяжкія злачынствы.

За мінулы год 2 супрацоўнікі інспекцыі — Цімур Казлоў і Аляксандр Цяслёнак — былі ўзнагароджаны ўпраўленнем унутраных спраў, сёлета ўжо Таццяна Вішнікіна і сам Уладзімір Хашкоўскі атрымалі ўзнагароды.

…Нішто не каштуе так дораг, як свабода. Таму лепш яе берагчы, чым праявіць слабіну і апынуцца пад пільным назіраннем. Ці не так?

Ганна ГРЫДЗЮШКА.