Знаёмцеся:

намеснік старшыні райвыканкама,

начальнік упраўлення сельскай гаспадаркі і харчавання

Дзмітрый МIХАЛЁЎ

Нарадзіўся ў 1983 годзе ў Асіповічах. Выбарам пасля заканчэння СШ № 3 стала сельская гаспадарка. Спачатку вучыўся ў Жыліцкім дзяржаўным сельскагаспадарчым каледжы, потым завочна атрымліваў агранамічныя веды ў Беларускай дзяржаўнай сельскагаспадарчай акадэміі. Там жа ў 2012 годзе яму ўручылі дыплом яшчэ па адной спецыяльнасці — “кіраванне арганізацыямі і падраздзяленнямі АПК”.

Уся працоўная дзейнасць Дзмітрыя Аляксандравіча праходзіла на Асіповіччыне. Распачынаў у 2004 годзе на пасадзе галоўнага агранома СВК “Калгас “Карытнае”, потым быў начальнікам вытворчага ўчастка ў СВК “Калгас “Чырвоны ўдарнік”, у 2010-м прыйшоў у райсельгасхарч на пасаду інспектара па кантролі за якасцю сельскагаспадарчай прадукцыі, пазней стаў галоўным спецыялістам аддзела раслінаводства. Некаторы час узначальваў СВК “Калгас “Бярэзіна”, затым рабіў інжынерам па ахове працы ў Асіповіцкім філіяле ААТ “Жэлдорсэрвіс г. Магілёў”. Два гады назад прафесійны шлях зноў прывёў ва ўпраўленне сельскай гаспадаркі і харчавання райвыканкама.

Мэтанакіраваны, па характары ўраўнаважаны. З павагай ставіцца да калектыву, лічыць яго асноўным фактарам падтрымкі ў рабоце.

Задач, якія зараз стаяць перад аграпрамысловым комплексам раёна, Дзмітрый Аляксандравіч выдзяляе некалькі. Галоўная — забяспечыць меры па эфектыўнасці гаспадарання, пры мінімальных выдатках атрымліваючы максімум сельгаспрадукцыі. Асноўная стаўка ў жывёлагадоўлі і раслінаводстве — на тэхрэгламент. Лічыць, што агульны поспех асобна ўзятай гаспадаркі залежыць ад кожнага з яе працаўнікоў. Перспектыву АПК раёна таксама бачыць у захаванні і далейшым узмацненні кадравага патэнцыялу.