На чарговым пасяджэнні райвыканкама, якое прайшло 3 сакавіка пад началам першага намесніка старшыні райвыканкама Васіля Пятроўскага, было разгледжана больш за паўсотню разнастайных пытанняў — аб ліцэнзіях на ажыццяўленне рознічнага гандлю, мерах па аптымізацыі дакументаабароту і ўдасканальванню дакументацыйнага забеспячэння кіравання, раённых мерапрыемствах па навядзенні парадку на зямлі і добраўпарадкаванні населеных пунктаў у 2010 годзе і г.д.

З інфармацыяй «Аб рабоце ўстаноў культуры раёна па арганізацыі вольнага часу дзяцей і падлеткаў” выступіла начальнік аддзела культуры райвыканкама Iрына Раманчук.
Было адзначана, напры-клад, што ў нас павялічылася колькасць праводзімых для хлопчыкаў і дзяўчынак масавых мерапрыемстваў. Больш актыўна і насычана арганізаваны вольны час школьнікаў у канікулы. Чытачамі бібліятэк нашай бібліятэчнай сістэмы з’яўляюцца 98% ад агульнай колькасці дзяцей у раёне. Ва ўстановах культуры зараз для падлеткаў дзейнічае 205 клубных фарміраванняў — у сярэднім на адну ўстанову іх прыходзіцца 5,85, тады як абласны паказчык — 4. Штогод для хлопчыкаў і дзяўчынак праводзіцца больш за 1,5 тысячы кінамерапрыемстваў. Найбольш папулярныя формы арганізацыі вольнага часу — танцавальныя вечары, дыскапраграмы, відэадыскатэкі. У раённым гісторыка-краязнаўчым музеі ладзяцца музейныя ўрокі. Запатрабаванымі ў падлеткаў раёна сталі фестывалі рок-музыкі «Анты-поп”, па брэйк-дансу, «Дом, дзе нараджаюцца таленты”, конкурсы «Міні-міс Асіповічы” і «Асілак”, тэатралізаваныя прадстаўленні з роставымі кукламі і інш.

Разам з тым застаецца і шэраг нявырашаных праблем. У прыватнасці, не атрымаў належнага распаўсюджвання шэраг цікавых і патрэбных аб’яднанняў. Мала арганізуецца клубаў тэхнічнай творчасці, падлеткавых клубаў прававой, маральна-эстэтычнай накіраванасці. Не ва ўсіх установах ствараюцца дыскаклубы. Не праводзіцца работа па з’яўленні новых клубных фарміраванняў для дзяцей і падлеткаў, удасканальванні ўжо дзейнічаючых і прыцягненні ў іх большай колькасці ўдзельнікаў у раённым Цэнтры культуры і вольнага часу, Пагарэльскім, Малагарожскім, Градзянскім, Цяплушскім, Замошскім сельскіх клубах.

Застаецца нізкай колькасць непаўналетніх, якія стаяць на ўліку ў адпаведнай камісіі і ўнутрышкольным уліку, дзяцей з няўдалых сем’яў, уцягнутых у фарміраванні клубных устаноў. Недастаткова актыўна прыцягваюцца да сумеснай работы па арганізацыі культурна-масавых, інфармацыйна-адукацыйных мера-прыемстваў установы аховы здароўя, фізкультуры і спорту. Застаецца невысокім мастацка-эстэтычны ўзровень дыскатэчных праграм, у сцэнарыі дыскатэк і дыскаклубаў недастаткова ўключаюцца выхаваўча-пазнавальныя элементы. З 30 устаноў клубнага тыпу, якія арганізоўваюць танцавальныя праграмы, дзіцячыя дыскатэкі праводзяць толькі 4. У Савецкім Доме культуры, Градзянскім, Дражненскім, Пагарэльскім, Замошскім, Малагарожскім, Радуціцкім сельскіх клубах тэхнічнае аснашчэнне дыскатэк не адпавядае сучасным патрабаванням.

Натуральна, ажыўленае абмеркаванне разгледжанага пытання знайшло сваё адлюстраванне ў прынятым — як і па ўсіх іншых — членамі райвыканкама рашэнні.