Шмат хто і да гэтага часу па інерцыі называе Асіповіцкі прафесійна-тэхнічны каледж ліцэем, але прайшло ўжо некалькі гадоў, як навучальная ўстанова змяніла свой статус. I ўсё дзякуючы групе тэхнікаў-будаўнікоў, якія ў 2014 годзе першымі атрымалі дыплом аб сярэдняй спецыяльнай адукацыі.

Напачатку жадаючых атрымаць узгаданую адукацыю было значна больш, аднак да пераможнага фінішу дайшлі толькі самыя зацятыя і мэтанакіраваныя. Прычым сярод 12 выпускнікоў ёсць і 2 дзяўчыны. Адразу сённяшнія выпускнікі атрымалі прафесійна-тэхнічную адукацыю, а ўжо на яе базе — сярэднюю спецыяльную.

— Пражылі разам некалькі гадоў, — кажа куратар былых навучэнцаў Юрый Абмоін. — Усялякае здаралася. Часам даводзілася быць і за маці, і за бацьку, вырашаць пэўныя пытанні, дапамагаць. Лёгка ў працы з дзецьмі не бывае, кожны — індывідуальнасць. Спадзяюся, з іх атрымаліся сапраўды годныя будаўнікі.

Ёсць сярод выпускнікоў і актывісты, якія атрымалі пахвальныя граматы за дасягненні ў вучобе, спорце і грамадскім жыцці каледжа: Iван Кавальчук, Арцемій Чорны, Алег Пакроўскі, Дзмітрый Мігуцкі, Сяргей Iмамаліеў. Акрамя таго, разам з дыпломам аб адукацыі юнакам і дзяўчатам уручаны і накіраванні на першае месца працы. Характэрна, што палова спецыялістаў адправіцца па размеркаванні на Мінскі завод грамадзянскай авіяцыі. Астатнія ж засталіся ў нашым раёне. Напрыклад, дзяўчаты будуць працаваць у АДУКВП «Водаканал» і ўстанове прарабскага пункта Асіповічы Магілёўскай дыстанцыі грамадзянскіх збудаванняў № 5. Варта адзначыць, што разам з групай ДС-1 сярэднюю спецыяльную адукацыю атрымалі і некалькі завочнікаў.

Будаўнічыя спецыяльнасці даволі прэстыжныя сёння, і 12 наваспечаных тэхнікаў-будаўнікоў відавочна не памыліліся з выбарам прафесіі. А ў каледжы вырашана вопыт замацаваць: абвешчаны чарговы набор на гэтую спецыяльнасць. Краіне патрэбны будаўнікі — не ўпусціце свой шанс!

Мария ТАЛЕЙКО.