13 лютага ва Узброеных Сілах
Рэспублікі Беларусь быў праведзены адзін з галоўных воінскіх рытуалаў — Прысяга
маладога папаўнення.

Навабранцам, якія былі прызваны
на службу ў часці Асіповіцкага гарнізона, былі створаны ўсе ўмовы, каб кожны з
іх як мага хутчэй адчуў сябе неад’емнай част-кай вайсковага калектыву. Для
навучання маладых салдат былі падабраны вопытныя афіцэры, найбольш адказныя
малодшыя камандзіры. Роля апошніх у рабоце з папаўненнем асабліва вялікая —
менавіта сяржанты закладваюць падмурак статутных нормаў і правілаў
узаемаадносін паміж ваеннаслужачымі тэрміновай службы, вучаць іх азам ваеннага
майстэрства.

Хутка праляцелі тыдні,
адведзеныя на адаптаванне да армейскага жыцця, і вось — дзень Прысягі. Кожны
навабранец чакае яго з хваляваннем. Гэта зразумела: Прысяга — не проста кароткі
тэкст, які трэба ў голас паўтарыць, гледзячы ў твар сваіх таварышаў па зброі.
Яна — сімвал узятага на сябе вялікага грамадзянскага абавязку: не шкадуючы сіл
служыць Радзіме, а калі спатрэбіцца — аддаць за яе жыццё.

Праз паўтара года сённяшнія
юнакі са зноў прыбыўшага папаўнення пераўтворацца ў сапраўдных мужчын — армію
называюць школай жыцця зусім недарэмна. І ўсё ж галоўным, што атрымае кожны салдат
падчас тэрміновай службы, будзе ўзнікшае падчас прынясення Прысягі яснае
разуменне простай і важнай ісціны: абарона Айчыны — справа кожнага мужчыны.
Незалежна ад таго, носіць ён цывільны пінжак альбо ваенны мундзір.

Дзмітрый САЎРЫЦКI.