У якім узросце можна атрымаць першую перамогу? Сучаснае маладое пакаленне пачынае з 6 месяцаў! Удзельнікі дзіцячага конкурсу “Карапуз-шоу”, які адбыўся ў Дзень абароны дзяцей у гарадскім парку, былі у самай малой узроставай катэгорыі: ад паўгода да чатырох.

Спачатку пад вясёлыя гукі музыкі ўсе жадаючыя ўпрыгожылі пляцоўку каля сцэны сваімі малюнкамі, і ў намінацыі “Малявалка” перамаглі Ганна і Ульяна Паланейчык. Потым пачалося самае цікавае. На “Першы старт” выйшлі карапузы ва ўзросце 6 – 10 месяцаў, а адразу пасля іх “Першыя крокі” зрабілі тыя, каму ўжо да 1,5 года. Спецыяльна для маленькіх канкурсантаў былі засланы дывановыя дарожкі, па якіх яны паўзлі, крочылі, беглі насустрач сваім бацькам, фінішу і вікторыі. У першай намінацыі самым хуткім стаў Антон Шабуня, ў другой – Леанід Пацкевіч. Больш старэйшыя дзеці, ад 1,5 да 4 год, змагаліся ў намінацыі “Гоншчыкі”. Трэба было праехаць на веласіпедзе як мага хутчэй – тут мацнейшымі сталі Станіслаў Збанок і Яніна Кукушкіна.

Усяго ж у “Карапуз-шоу” прынялі ўдзел 27 юных жыхароў Асіповіччыны, а конкурс малюнкаў на асфальце прыцягнуў увагу каля трох дзесяткаў малых мастакоў. Усе ўдзельнікі атрымалі дыпломы і розныя прызы: пірамідкі, машынкі, наборы для пясочніцы і інш. Акрамя таго, на працягу конкурсу дзецям уручалі і іншыя падарункі. А пасля конкурснай праграмы адбыўся святочны канцэрт, падрыхтаваны пачынаючымі артыстамі.

Хоць пераможцаў і вызначылі, але гэта не значыць, што астатнія былі горш: магчыма, нехта ўтаміўся, спужаўся вялікай колькасці незнаёмцаў, або проста прыйшоў час адпачываць. Гэта ж дзеці! І яны заўжды будуць лепшымі, асабліва для сваіх бацькоў. Малайцы, карапузы, вы былі на вышыні!

Марыя ТАЛЕЙКА.