У кожнага чалавека бываюць моманты, калі ўзнікае
магчымасць штосьці ў сваім жыцці рэзка змяніць да лепшага. Адважваюцца на такі
рашучы крок не ўсе: хтосьці не гатовы маральна да перамен, нехта надта доўга
збіраецца і ўпускае свой шанц. Ёсць і такія, для каго галоўны прынцып уласнага
існавання выдатна апісваецца вядомым прыслоўем пра сініцу ў руках і жорава ў
небе. А вось для Наталлі Сідарэнка — адной з маладых асіповіцкіх бізнес-вумен і
ў недалёкім мінулым эканаміста раённага аддзела адукацыі — узнікненне
магчымасці распачаць уласную справу найлепшым чынам супала з жаданнем
паспрабаваць сябе ў якасці індывідуальнага прадпрымальніка.

Аб тым, як будаваўся яе бізнес, што ён уяўляе сабой
сёння, якім бачыцца яго будучыня Наталля Уладзіміраўна і расказвае:

— Напэўна, пачаць трэба з прызнання, што я — чалавек
адначасова азартны і вельмі асцярожны, а цалкам рэалізаваць гэтыя якасці
характару наўрад ці можна дзесьці яшчэ, акрамя сферы прадпрымальніцтва. Тым не
менш, пераход у бізнес адбыўся далёка не адразу.

Даволі доўгі час муж Андрэй працаваў у фірме, якая
займаецца мантажом убудаванай мэблі. Справы ішлі добра, заказаў было шмат, таму
каб дапамагчы яму, нейкія абавязкі па рабоце з кліентамі даводзілася выконваць
і самой. Паступова са зносін з патэнцыяльнымі заказчыкамі стала зразумелым, што
попыт на ўзгаданыя элементы афармлення інтэр’ера на Асіповіччыне не цалкам
упісваецца ў існуючы фармат паслуг. Многія жадалі набыць толькі матэрыялы і
інструмент, а зборкай убудаванай мэблі — справай, не асабліва мудрагелістай —
мелі намер займацца самі. Вось і ўзнікла думка запоўніць існуючую нішу…

Муж ідэю падтрымаў з энтузіязмам, дапамог знайсці
патрэбныя для адкрыцця спецыялізаванай крамы сродкі, але сам займацца гэтай
клапотнай справай не пажадаў. Маўляў, тое, што раблю — справа надзейная, таму
калі твая ідэя “прагарыць”, без сродкаў на існаванне не застанемся. Ну а як
надзеі спраўдзяцца — унясём у спіс паслуг яшчэ і зборку ўбудаваных шафаў. Вось
так і ўзнікла крама “Цэтлік” — першы ў Асі-повічах спецыялізаваны магазін па
продажы мэблевай фурнітуры, матэрыялаў і інструментаў, неабходных для
самастойнага вырабу сучаснай мэблі. Які да ўсяго аказвае кансультацыйныя
паслугі саматужным цеслярам-чырвонадрэўшчыкам, а калі трэба — збірае мэблю “пад
ключ”.

— Ваша справа дэбютавала ў 2008 годзе, калі пачалі
праяўляцца першыя выявы сусветнага эканамічнага крызісу, а першую сваю гадавіну
адзначыла, калі яго наступствы адчула і наша краіна. Ці не празмерна рызыкоўны
час выбралі для пачатку свайго бізнес-праекту?

— Лепшы для бізнесу перыяд той, калі ёсць ідэя, у
якую верыш, і сілы, каб яе здзейсніць. Так што праблема не ў складанасцях часу,
а ў выбары стратэгіі дзеянняў, якія адпавядаюць існуючым умовам.

Калі хтосьці думае аб тым, як пачаць уласную справу,
раю вельмі грунтоўна распрацоўваць бізнес-план. Чым больш дасканалым ён будзе,
тым менш нечаканасцей сустрэнецца на першым, самым цяжкім этапе
прадпрымаль-ніцкага шляху. Наўрад ці ёсць сэнс удавацца ў дэталі, але адзначу,
што ў многім менавіта дзякуючы папярэдне праведзенаму аналізу магчымай рызыкі
ўдалося з мінімальнымі стратамі перанесці дэвальвацыю беларускага рубля, якая
адбылася летась 2 снежня. Сакрэт просты: напрыканцы 2008 года большасць тавараў
была распрададзена, падпісанне ўжо падрыхтаваных дамоў аб пастаўках на
надыходзячы год было перанесена на сярэдзіну снежня, а ўсе часова выведзеныя з
абароту сродкі канвертаваны ва “ўмоўныя адзінкі”.

З іншага боку, усё пралічыць немагчыма, таму з
непрыемнымі нечаканасцямі сустракацца даводзіцца ўсё роўна. Аднак дакладна
ведаючы, куды ідзеш, прасцей вызначыць і выправіць памылкі. Так, за 2008 год
магазін “Цэтлік” хаця і хутка стаў запатрабаваным, спрацаваў з адчувальнымі
стратамі — такой была плата за дапушчаныя пралікі. Галоўныя сярод апошніх —
празмерна звужаны асартымент, стандартнае — такое, як у канкурэнтаў —
цэнаўтварэнне, эканомія на рэкламе і не вельмі ўдалы выбар месца для
размяшчэння крамы.

Тры першыя пралікі летась удалося паспяхова
выправіць: да асноўных гандлёвых пазіцый дадаліся запатрабаваныя тавары для
будаўнічых работ, для паскарэння тавараабароту цэны на большасць тавараў
зменшаны да мінімуму, уве-дзена бясплатная дастаўка набытых тавараў. І галоўнае
— магазін замацаваў сваю рэпутацыю надзейнага партнёра як у пакупнікоў, так і ў
пастаўшчыкоў.

Што ж тычыцца месца — “Цэтлік” знаходзіцца ў
арандаваным пакоі будынка КБА-1 — то яно празмерна малое, каб крама магла
развівацца ў тым накірунку, які бачыцца перспектыўным. З гэтай нагоды і
давялося ўсе мінулагоднія даходы ўкласці ў адкрыццё яшчэ аднаго “Цэтліка” —
магазіна ў будынку былой хімчысткі на вуліцы Рымы Кунько. Дарэчы, адбылося яно
на мінулым тыдні.

— Дзве аднайменныя крамы — гэта ўжо цэлая гандлёвая
сетка. “Цэтлікі” будуць братамі-блізнятамі, альбо ў іх дзейнасці
прадугледжваецца нейкая спецыфіка?

— Накірунак дзейнасці першага застанецца нязменным, а
вось яго “малодшы брат” задуманы як свайго роду цэнтр для знаёмства асіпаўчан з
навейшымі тэндэнцыямі ў афармленні жылых і офісных памяшканняў, падборы даступных
па цане матэрыялаў, неабходных для стыльнага іх аздаблення.

На жаль, рэалізаваць гэтую задумку ў поўным аб’ёме з-за
недахопу абарачальных сродкаў адразу немагчыма, таму на першым этапе давялося
абмежавацца галоўным — абоямі. На сёння “Цэтлік” ужо можа прапанаваць каля 80
відаў шпалер самых актуальных фактур ды расфарбовак, а яшчэ прыкладна 200 —
прывезці на заказ.

Зразумела, кожнаму кліенту будзе таксама аказана
кваліфікаваная дапамога ў распрацоўцы дызайну сапраўды эксклюзіўнага інтэр’еру.
Апошняе лічу асабліва важным: густ людзей у адносінах да выгляду памяшканняў,
дзе даводзіцца жыць і працаваць, трэба выхоўваць. Надта доўга ў нас панаваў
стэрэатып “каб было не горш чым у суседзяў”, але ж куды цікавей зрабіць так,
каб кожнае памяшканне мела выразную індывідуальнасць!

Гутарыў Дзмітрый САЎРЫЦКІ.