Без віны вінаваты

У рэйтынгу папулярнасці рэчаў, на якія ў сучасным свеце збіраюць грошы, машына саступае толькі ўласнаму жыллю. Дзеля патрэбнай на яе набыццё сумы мы гатовыя харчавацца толькі бульбай з салёнымі агуркамі, адмовіцца ад абновак і вячорак з сябрамі, забыцца пра адпачынак і працаваць на трох работах. Вольны час праводзім за вывучэннем аўтамабільных сайтаў і ў гутарках з “дасведчанымі хлопцамі”. Нарэшце — доўгачаканы момант: вызначаны марка і мадэль будучага асабістага аўто, грошы назапашаныя. Для новага аўтамабіля з салона, праўда, замала, а вось на патрыманую іншамарку хапае. Адпраўляемся на аўтарынак, купляем сваю мару… Хэпі-энд…

Аўтамабільная гісторыя асіпаўчаніна Х. хэпі-энду не мела. На рынку “Ждановічы” ён, не афармляючы рахунак-даведку або дагавор куплі-продажу, набыў ва ўласнасць аўтамабіль… з падробленым пасведчаннем аб рэгістрацыі транспартнага сродку. Зразумела, аб дадзеным факце Х. да часу не ведаў. Сапраўднасць пасведчання аб рэгістрацыі транспартнага сродку выклікала сумненне ў супрацоўнікаў МРЭА УУС Бабруйскага гарвыканкама, дзе грамадзянін спрабаваў паставіць “каня” на ўлік. Крыміналістычная экспертыза пацвердзіла падазрэнне міліцыянераў, выявіўшы прыкметы падробкі дакумента. “Оpel Frontera” на дарозе больш не з’яўляўся: каб “бяспашпартны” аўтамабіль рана ці позна не апынуўся на штрафстаянцы, без віны вінаваты Х. яго разабраў і прадаў па частках. Гэта была адзіная магчымасць вярнуць хоць бы долю нялёгкай працай заробленых грошай, бо з-за адсутнасці якіх-небудзь дакументаў вышук былога ўладальніка машыны ўскладнены…

Карацей, пры куплі аўтамабіля варта звяртаць увагу не толькі на тэхнічны стан, адпаведнасць нумароў кузава і рухавіка, але і на дакументы машыны. Заломы, пацёртасці, дапіскі, размытасць друкаваных літар, іншыя дробныя дэталі могуць быць прыкметамі фальсіфікацыі.

У адпаведнасці з нарматыўнымі дакументамі дагавор куплі-продажу транспартных сродкаў паміж фізічнымі, юрыдычнымі асобамі, індывідуальнымі прадпрымальнікамі складаецца ў трох экзэмплярах і рэгіструецца ў прысутнасці бакоў у Дзяржаўтаінспекцыі МУС у дачыненні да механічных транспартных сродкаў і прычэпаў да іх, у дачыненні да колавых трактароў, прычэпаў да іх, самаходных машын — у Дзяржаўных інспекцыях па наглядзе за тэхнічным станам машын і абсталявання Міністэрства сельскай гаспадаркі і харчавання. Гарантыяй удалай куплі аўтамабіля стане зварот у МРЭА ДАІ: яго работнікі дапамогуць праверыць дакументы і аформіць здзелку ў адпаведнасці з дзеючым заканадаўствам.

Дзмітрый МУЗЫЧЫН, старшы следчы райаддзела Следчага камітэта.