Чым больш у асіпаўчан святаў, тым
больш у работнікаў раённага Цэнтра культуры клопату. У параўнанні з 2008 у мінулым годзе
аб’ём працы ў тутэйшых «рознарабочых мастацтва” адчувальна павялічыўся.

Лічбы. Усяго за 2009 год РЦК арганізаваў і
правёў 434 мерапрыемствы — на 79 больш. З іх платных — 120, што перавышае
папярэдні вынік больш чым удвая.

На сёння ў сярэдніх
агульнаадукацыйных школах горада 3.644 вучні, 12% задзейнічана ў клубных
фарміраваннях Цэнтра. Для дзяцей і падлеткаў у параўнанні з 2008 годам, калі
была праведзена 101 вечарына, іх колькасць скарацілася да 93. Паменшылася і
сямейных мерапрыемстваў — з 21 да 13.

Затое павялічыўся і стаў больш
разнастайным шэраг забаўляльных праграм для моладзі, а таксама арганізаваных
«вячорак” для пажылых і адзінокіх людзей, ветэранаў. У першым выпадку — з 50 да
84, у другім — з 16 да 32.

Маштабы. З 434 мерапрыемстваў 42 прайшло ва
ўстановах культуры на вёсках і ў аграгарадках, але пашыраць такую форму работы,
як выезды на раён, перашкаджае адсутнасць уласнага транспарту.

Перыядычныя выступленні народнага
ансамбля эстраднага танца «Капрыз” у вайсковых часцях Асіповічаў, Цэлі і Лапіч
фактычна сталі «шэфскімі”. А вакальная група «Мелодыі душы” ў рамках Года
роднай зямлі знаёміла школьнікаў горада і раёна з творчасцю нашага
музычна-паэтычнага тандэма В.Шышкаўца і А.Тамашэўскага, выконваючы іх шлягеры.
Усяго прайшло 6 падобных канцэртаў.

Наладжаны цесныя сувязі са
спецшколай-інтэрнатам, у якой перыядычна арганізоўваюцца тэматычныя і ігравыя
праграмы, канцэрты, спектаклі і фотавыставы. Не застаюцца без увагі і дзеткі з
малазабяспечаных і нядобранадзейных сямей. Яны могуць бясплатна наведваць
вечары адпачынку і дыскатэкі, запрашаюцца на дабрачынныя ёлкі, навагоднія
ранішнікі, тэатралізаваныя святы і г.д.

За год было праведзена 4
фотавыстаўкі ў самім РЦК, таксама ў спецшколе-інтэрнаце, Лапіцкай і Ясенскай
школах, а сам фота-клуб «Раніца” атрымаў грамату ад Міністэрства прыродных
рэсурсаў і аховы навакольнага асяроддзя Рэспублікі Беларусь.

Працуе і студыя гуказапісу: летась
20 чалавек карысталіся яе паслугамі.

Навінкі. Створаны клуб стасункаў
«Эдэльвейс”, які наведваюць людзі ад 30 да 75 гадоў. Яго члены арганізавана
выязджаюць на экскурсіі і пікнікі, збіраюцца ў Цэнтры на абмеркаванне цікавячых
тэм і г.д. Апошнім часам мерапрыемствы клуба пачаў спансіраваць мясцовы філіял
касметычнай кампаніі «Faberlic”: тры вечары адпачынку прайшлі пры яго
падтрымцы.

Некалькі месяцаў таму Сцяпан
Саханчук і Андрэй Язвінскі сабралі фольк-мадэрн калектыў, у які ўвайшлі толькі
«правераныя” і прафесіянальныя музыкі. За аснову для рэпертуару бяруцца
народныя песні, перакладзеныя на сучасныя рытмы і мелодыі. Прэзентацыя
рыхтуецца на люты.

Падрыхтавала Ганна МАЦКЕВІЧ.