ААТ “Гандаль” вядзе добраўпарадкаванне тэрыторыі вакол новага памяшкання кафэ па вул. Сумчанкі. Хутка тут з’явяцца аўтапаркоўка, прыгожы газон і зручныя дарожкі. Усяго на гэтыя мэты выдаткавана каля  120 млн. рублёў.

Месячнік бяспекі працы пры выкананні работ на будаўнічых аб’ектах і будпляцоўках раёна пройдзе з 19 мая па 20 чэрвеня.

Дыпломы першай ступені прывезлі юныя танцоры ДШМ № 1 узорнага ансамбля “Крынічка” (педагог Марыя Шабуневіч) з рэспубліканскага конкурсу харэаграфічнага мастацтва “DANCE CITY”. Дзеці выступалі ў намінацыі “народны танец” ва ўзроставых групах 12-15 і 9-11 гадоў з танцамі “Ойра” і “Лявоніха”. Апошнія былі ўдастоены і спецыяльнага прыза за захаванне беларускіх народных традыцый.

“Матацыкліст” — такая прафілактычная акцыя праходзіць у рэспубліцы з 12 па 22 мая.

Каля 23 тон макулатуры, звыш 4 тон шклабою, 200 кілаграмаў поліэтылену закупіла райспажыўтаварыства ў студзені-красавіку ад насельніцтва раёна. Агульная сума выплачаных людзям сродкаў — больш за 15 млн. рублёў.

Учора аддзел ЗАГС райвыканкама зарэгістраваў два шлюбныя саюзы. Маладыя пары прынялі рашэнне стаць мужам і жонкай менавіта ў Міжнародны дзень сям’і.

Замену драўлянай агароджы на бетонную вакол могілак у вёсцы Асяродак плануе правесці ў бліжэйшы час Ясенскі сельсавет. Работы будуць выкананы сіламі ДУКВП “Райсэрвіс”.

Станцыя Асіповічы ў студзені-красавіку пагрузіла звыш 100 тон разнастайных грузаў. Сярод арганізацый, якія найбольш актыўна адгружаюць прадукцыю, завод жалезабетонных канструкцый і лясгас — 35,5 і 31,6 тыс. тон адпаведна.

Чацвёра балельшчыкаў чэмпіянату свету па хакеі скарысталіся паслугамі гасцініцы “Асіповічы”. Немец і трое чэхаў выйшлі на сувязь з адміністрацыяй праз інтэрнэт і заказалі жаданыя нумары. Пражыванне ў атэлі абышлося кожнаму ў 220.200 рублёў.

Адрасную сацыяльную дапамогу ў I квартале атрымала 479 асіпаўчан. Агульная сума дзяржаўнай дапамогі — 536,7млн. рублёў.