РАУС

У перыяд з 4 па 11 мая зафіксавана 12 супрацьпраўных учынкаў: крадзяжы і факты нанясення цялесных пашкоджанняў — па 3, выпадкі парушэння антыалкагольнага заканадаўства — 6.

Раскрыты крадзеж, які адбыўся ў студзені 2013 года. Выяўлена месца знаходжання дзвюх асоб, што ўхіляліся ад выплаты аліментаў.

Падчас правядзення земляных работ каля вёскі Акцябр знойдзены артылерыйскі снарад часоў Вялікай Айчыннай вайны.

6 чысла ў райбальніцу дастаўлены 42-гадовы асіпаўчанін з пашкоджаннем вока і іншымі траўмамі, якія яму нанёс 33-гадовы пляменнік падчас спрэчкі.

У ноч на 8 мая дапамога медыкаў спатрэбілася 55-гадоваму госцю са Старых Дарог, які ў п. Татарка штосьці не падзяліў з мясцовым жыхаром. Апошні нанёс пацярпеламу некалькі ўдараў, вынікам якіх стала чэрапна-мазгавая траўма і пералом носа.

На наступны дзень раней судзімы 50-гадовы асіпаўчанін ударыў нажом у горла 29-гадовую сужыцельніцу.

РАСК

Узбуджана 9 крымінальных спраў. У іх ліку тры ў адносінах адказнага работніка ААТ “Бабруйскі завод буйнапанэльнага домабудаўніцтва”, які ў перыяд з 1 сакавіка па 31 мая мінулага года садзейнічаў фальсіфікацыі справаздачнай дакументацыі шэрагу сваіх падначаленых з мэтай незаконнага атрымання грашовых сродкаў.

Пачаты следчыя дзеянні па факце ўгону трактарнага прычэпа ААТ “Асіповічыаграпрамтэхзабеспячэнне” з мехдвара в. Осава. Кошт знікшай маёмасці — каля   12 млн. рублёў.

ДАI

Спынена 151 парушэнне правілаў руху, прыцягнута да адказнасці 5 п’яных вадзіцеляў і 9 пешаходаў без святлоадбіваючых элементаў. Адбылося 7 ДТЗ.

9 чысла вадзіцель аўтацягніка, які перавозіў 20 тон металічнага лому, страціў кантроль над машынай, тая на вялікай хуткасці перасекла раздзяляльную паласу шашы Мінск-Гомель і заехала прыблізна на 70 метраў у поле каля в. Цяплухі. Каб выцягнуць “сеўшы” на восі на ўзаранай глебе грузавік, спатрэбілася спецыяльная тэхніка, якая працавала амаль два дні.

Да ведама вадзіцеляў! З 12 па 21 мая праводзіцца рэспубліканская прафілактычная акцыя “Дзіця — галоўны пасажыр”, мэта якой — прадухіленне ДТЗ з удзелам непаўналетніх.

АУСТ

Узбуджаны крымінальныя справы па фактах крадзяжу маёмасці і збыту наркатычных рэчываў. Затрыманы злачынца, на якога аб’яўлены вышук. Складзена 12 адміністрацыйных пратаколаў, суправоджана 203 цягнікі.

Увага! 15 мая з 10.00 да 12.00 начальнік Асіповіцкага АУСТ палкоўнік міліцыі Уладзімір Уладзіміравіч Мамсікаў праводзіць “прамую тэлефонную лінію” па пытаннях правапарадку на аб’ектах чыгуначнага транспарту. Тэлефон — 6-25-46.

РАНС

6 чысла ў Асіповічах на вул. Мічурына адбылося адразу два пажары: каля 13.20 па невядомай прычыне загарэлася нежылая палова двухкватэрнага дома, у 23.00 — верагодна з-за неасцярожнасці пры курэнні — успыхнула не маючая гаспадароў хата.

Надвячоркам 7 мая ў гаражным кааператыве “Аўтааматар-2” выяўлена моцнае задымленне адной з пабудоў. Пры гэтым было чутна, што там на павышаных абаротах працуе рухавік аўтамабіля.

Пасля ўскрыцця зачыненых знутры дзвярэй у салоне машыны быў знойдзены страціўшы прытомнасць 32-гадовы мужчына. Пацярпелы знаходзіўся ў крытычным стане, таму сардэчна-лёгачную рэанімацыю выратавальнікі правялі яму самастойна, не чакаючы прыезду хуткай меддапамогі.