Напачатку мінулай восені на Асіповіцкім заводзе жалезабетонных канструкцый была здадзена ў эксплуатацыю лінія па выпуску жалезабетонных шпал. Сёння, калі абсталяванне па вырабу шпал адпрацавала свае першыя 5 месяцаў, надышоў час зрабіць пэўныя вывады аб эфектыўнасці інвестыцый у гэты праект. Расказвае начальнік планава-эканамічнага аддзела АЗЖБК Надзея Іванова:

— За першыя чатыры месяцы работы да канца 2009 года на новай вытворчай лініі было выраблена прыкладна 34.600 шпал на суму каля 4,2 мільярда рублёў. Што істотна, прадукцыя адразу адпраўлялася спажыўцу — Брэсцкаму аддзяленню Беларускай чыгункі. Дакладна ацаніць уплыў новай лініі на памер даходаў прадпрыемства ў цэлым пакуль немагчыма, аднак яно, бясспрэчна, значнае. Да прыкладу, рэнтабельнасць летась у параўнанні з 2008 годам узрасла ў 2,2 раза і дасягнула ўзроўню 13,4%.

Асноўная перавага шпалы перад іншымі вырабамі з жалезабетону — яе «ўсесезоннасць”: попыт на прадукцыю, якая ўжываецца для будаўніцтва, узімку рэзка змяншаецца, у той час як актыўнасць рамонтных работ на чыгуначных пуцях ад пары года залежыць у значна меншай ступені.

Натуральна, прадпрыемства мае намер сёлета эксплуатаваць абсталяванне па вырабу шпал з максімальнай нагрузкай, маючы намер за год выпусціць каля 20 тысяч м³ вельмі патрэбнай Беларускай чыгунцы прадукцыі. Лічба цалкам рэальная: за студзень — з улікам працяглых святаў і яшчэ не зусім дасканалага майстэрства задзейнічанага на лініі персаналу — было выраблена каля 2 тысяч м3 шпал.

Дарэчы, аб персанале. З пачаткам вытворчасці жалезабетонных шпал завод стварыў 50 новых рабочых месцаў. Вакантныя пасады былі заняты кваліфікаванымі спецыялістамі, якія перайшлі сюды з іншых прадпрыемстваў горада. Адным з фактараў, які спрыяў узрастанню важкасці АЗЖБК як спажыўца высакаякасных працоўных рэсурсаў, стаў узровень аплаты працы. Сярэдні заробак тут летась склаў 1,2 мільёна рублёў, а да канца бягучага года ён, па разліках эканамістаў, узрасце прыблізна да 1,5 мільёнаў.