Экспазіцыі трох залаў раённага гісторыка-краязнаўчага музея прысвечаны Вялікай Перамозе. Фотавыстава, асобны пакой “1941-1943 гады”, тэматычная падборка асіповіцкіх калекцыянераў — значкі, маркі, канверты, паштоўкі, медалі і іншае, чакаюць наведвальнікаў. Установа будзе працаваць і ў святочны дзень.

25.203 адцісканні — столькі дзён прайшло з Дня Перамогі — збіраюцца “сабраць” 9 Мая сумеснымі намаганнямі аматары варкаўта пры падтрымцы БРСМ у гарадскім парку пасля асноўных урачыстасцей. Далучыцца да акцыі могуць усе жадаючыя!

Паслугу часовага прытулку грамадзянам, якія апынуліся ў крызіснай сітуацыі (пацярпелі ад насілля, стыхійных бедстваў і інш.), аказвае раённы Цэнтр сацыяльнага абслугоўвання насельніцтва. У спецыяльна абсталяваным памяшканні могуць размясціцца 3 чалавекі і знаходзіцца тут да 10 дзён.

Глазураваныя сыркі, якія выпускаюцца Асіповіцкім вытворчым цэхам ААТ “Бабушкина крынка” — кіруючая кампанія холдынга “Магілёўская малочная кампанія “Бабушкина крынка”, за шырокі асартымент і якасць прадукцыі адзначаны Дыпломам II ступені на рэспубліканскім конкурсе спажывецкіх пераваг “Прадукт года-2014”.

Каля дзясятка землякоў у дзень карыстаюцца паслугай сайта talon.by, заказваючы сабе квіткі на прыём да ўрача. Часцей за ўсё інтэрнэт-заяўкі паступаюць на візіт да вузкіх спецыялістаў.

Група “Дамскі капрыз” танцавальнай школы Дзіяны Шатанавай увайшла ў тройку лідараў на адкрытым чэмпіянаце краіны па сучасных танцах, які праходзіў нядаўна ў сталіцы. Адметна, што калектыў аб’яднаў асіпаўчанак рознага ўзросту — самай старэйшай ужо за 50.

З 15 мая па 30 верасня — сезон палявання на дарослых самцоў казулі еўрапейскай трафейнай якасці з выкарыстаннем паляўнічага ружжа, а таксама на ваўка, лісіцу звычайную, янотападобную сабаку ружэйным і безружэйным спосабам з засады, з падыходу, загонам з пад’езду. Паляванне на дзіка праводзіцца згодна з “Часовым палажэннем аб асобым рэжыме выкарыстання рэсурсаў дзіка на тэрыторыі Рэспублікі Беларусь”.

11 сажалак — 5 нагульных і 6 для гадавання — зарыбляе зараз ААТ “Рыбгас “Свіслач”. Каля 70% “пасадачнага матэрыялу” складае карп. Таксама ў спісе таварнай рыбы амур, таўсталобік, шчупак і сом.