РАУС

У перыяд з 14 па 20 красавіка зафіксавана 7 супрацьпраўных учынкаў: крадзяжы — 3, выпадкі парушэння антыалкагольнага заканадаўства — 4.

Раскрыта 3 раней здзейсненыя злачынствы: рабаўніцтва, крадзяжы веласіпеда і грошай.

15 чысла невядомы злодзей праз вынятую шыбу пранік у кватэру непрацуючага асіпаўчаніна, адкуль вынес прыстаўку для прыёму лічбавых тэлеканалаў, пульт кіравання і дэцыметровую антэну коштам 900 тыс. рублёў.

РАСК

Узбуджана 7 крымінальных спраў. Найбольш рэзанансная — 13 красавіка каля 22 гадзін 26-гадовы мужчына і двое падлеткаў згвалтавалі 16-гадовую дзяўчыну.

Кваліфікавана як «крадзеж групай асоб» спроба жыхароў в. Тарасавічы зняць жалезныя вароты з сядзібы аднавяскоўца. Незвычайная розніца ва ўзросце зламыснікаў: адзін — 66-гадовы пенсіянер, другі — 16-гадовы падлетак.

У чарговы раз следчыя бяруцца за разгляд справы аб незаконнай здабычы рыбы, якая адбылася летам 2013 года, калі рыбак-браканьер з дапамогай пяці сетак атрымаў улоў сукупным коштам каля 5,5 млн. рублёў. Раней разгляд абставін гэтага злачынства ўжо чатыры разы спыняўся, а потым узнаўляўся.

ДАI

Спынена 206 парушэнняў правілаў руху, прыцягнута да адказнасці 3 п’яныя вадзіцелі і 17 пешаходаў без святлоадбіваючых элементаў. Адбылося 5 ДТЗ.

18 чысла аўтамабіль «Аўдзі» на 84-м кіламетры шашы Мінск-Гомель дагнаў аўтапоезд, які рушыў у спадарожным накірунку, і ўрэзаўся ў яго прычэп.

19 красавіка каля 22.00 вадзіцель «БМВ Х5» пры сустрэчным раз’ездзе з грузавой машынай на вул. Юбілейнай своечасова не заўважыў, як з-за апошняй на пешаходны пераход раптоўна выехаў веласіпед. У выніку сутыкнення з нечаканай перашкодай два чалавекі, якія ехалі на веласіпедзе, атрымалі сур’ёзныя цялесныя пашко-джанні.

Увага! Да 30 красавіка праводзіцца мерапрыемства «Вучэбны аўтамабіль», падчас якога кантралюецца якасць практычнай падрыхтоўкі курсантаў аўташкол.

АУСТ

Узбуджана крымінальная справа па факту крадзяжу 3,5 млн. рублёў з банкаўскай карткі. Затрымана дзве асобы, на якіх аб’яўлены вышук. Складзена 67 адміністрацыйных пратаколаў, суправоджана 78 цягнікоў.

РАНС

Раніцай 18 чысла, верагодна з-за няспраўнасці газавай пліты, загарэўся дом у гарадскім зав. Магілёўскі. Гаспадар дома — 49-гадовы мужчына — падчас пажару загінуў.

IАЖіРС

Складзены 2 пратаколы па фактах браканьерскай здабычы рыбы.