Раней “раёнка” паведамляла аб тым, што на тэрыторыі горада быў затрыманы забойца, які хаваўся ад правасуддзя.

— Было гэта так, — расказаў малодшы сяржант міліцыі аддзялення патрульна-паставой службы АУСТ Дзмітрый Пінчук. — 6 сакавіка заступаў на начное дзяжурства. На разводзе, як звычайна, дзяжурны афіцэр давёў апошнія арыенціроўкі на злачынцаў, якія адшукваюцца, і заклікаў да асаблівай пільнасці: падазроны ў асабліва цяжкім злачынстве можа перасоўвацца ў напрамку Асіповічаў. Праходзячы па маршруце руху, на вакзале заўважыў, як малады чалавек з буйной радзімкай на твары энергічна гутарыў з дзяўчынай. У памяці ўсплыла арыенціроўка: “Асаблівая прыкмета — радзімка на твары”. На патрабаванне прад’явіць дакументы той адказаў, што дакументаў пры сабе не мае, але ўсю інфармацыю можа даць вусна…

Па патрабаванні Пінчука невядомы быў дастаўлены ў дзяжурную часць. Падчас працэдуры высвятлення асобы, чалавек быў апазнаны: 20-гадовы асіпаўчанін, раней неаднаразова судзімы — яго дадзеныя меліся ў базе АУСТ. У падазронага выявілі пярсцёнак, ноўтбук і мабільны тэлефон, якія належалі забітаму. Цяпер затрыманы праходзіць па справе па двух артыкулах — за крадзеж і забойства, учыненае з асаблівай жорсткасцю. Пакаранне па апошнім артыкуле прадугледжвае пазбаўленне волі на тэрмін ад 8 да 25 гадоў, пажыццёвае зняволенне або смяротнае пакаранне.